बाध्यताले मात्र नीजि अस्पताल जान्छन बिरामी

काठमाडौं-सरकारी अस्पतालमा पर्याप्त शैया नहुँदा भर्ना हुनुपर्ने कतिपय बिरामी निजी अस्पतालमा जान बाध्य हुने गरेको पाइएको आजको राजधानी दैनिकले समाचार छापेको छ |

कतिपय अस्पतालमा शैया अभाव हुँदा बिरामीहरु मर्कामा परेका छन् । मुख्यतः र्आइसीयूमा शैयाको अभाव खड्किने गरेको छ । अस्पतालहरुले समेत बिरामीमैत्री वातावरण सिर्जना नगर्दा बिरामीहरु अलमलमा पर्दै निजी अस्पतालमा धाउन बाध्य हुने गरेको पाइएको छ ।

स्वास्थ्य तथा जनसंख्या मन्त्रालयको पछिल्लो तथ्यांकअनुसार देशभर दुई सय २१ अस्पताल र १६ केन्द्रीय अस्पताल छन् । अहिले देशभरका सरकारी अस्पतालको शैयाको संख्या ६ हजार बढी रहेको छ ।

अस्पतालहरुले आफूले प्रदान गर्ने सेवाको शुल्कसम्बन्धी मापदण्ड निर्धारण गरेका छैनन् भने केन्द्रीय अस्पतालले शैया शुल्क समेत लिने गरेको पाइएको छ । केही अस्पतालमा शैया पाउन सोर्स समेत लगाउनुपर्ने बाध्यता छ । एक अस्पतालका अधिकारीले भने, ‘मलाई शैया चाहियो भनेर सोर्स लगाए । तर, हामीले त्यसो गर्न मानेनौं ।’

सरकारी अस्पतालले आईसीयूको शुल्क प्रतिदिन १ हजारदेखि ३ हजार रुपैयाँसम्म लिँदै आएका छन् । यस्तै निजी अस्पतालले ८ हजार ५०० देखि २१ हजारसम्म लिने गरेको देखिन्छ । अस्पतालहरुले प्रदान गर्ने सेवाको सुविधा र शुल्कसम्बन्धी मापदण्ड निर्धारण नहुँदा हचुवाको भरमा बिरामीले शुल्क तिर्नसपर्ने बाध्यता छ ।

स्वास्थ्य तथा जनसंख्या मन्त्रालयका नीति योजना तथा अनुगमन महाशाखा प्रमुख डा. विकास देवकोटाले मुख्यतः आईसीयूमा समस्या रहको बताए । उनले भने, ‘जिल्लाका साविक अस्पतालको स्तरोन्नत्ति गर्ने काम भइरहेको छ । आईसीयूमा समस्या देखिएको यथार्थ हो ।’

देशकै सबैभन्दा पुरानो अस्पताल वीर अस्पतालमा दैनिक दुई हजारदेखि दुई हजार आठ सय बिरामी आउने गरेका छन् । जसमा चार सय ६० वटा बेड रहेका छन् ।