लाख दिएर करोड असुल्ने नेतालाई एम्बुस थापेर पक्राउ

काठमाडौं-लाख रुपैयाँ ऋण दिएर करोडको तमसुक बनाउने र जग्गा बन्धक मात्र होइन रजिस्ट्रेसन नै पास गरेर १५ सय व्यक्तिलाई ठग्ने खुखार सहकार रामबाबु यादव प्रहरी फन्दामा परेका छन् | यो समाचार आजको नयाँ पत्रिका दैनिकले छापेको छ |

सर्लाही बरहथवा १० सीतापुरका रायलाई आफ्नो कर्तुत सार्बजनिक भएपछि भेष बदलेर भाग्दै गर्दा बुधबार दिउसो साढे १२ बजे प्रहरीले पक्राउ गरेको हो |

पक्राउ परेपछि यादवले आफु राष्ट्रिय जनता पार्टीको केन्द्रीय सदस्य भएको भन्दै प्रहरीलाई धम्क्याएका थिए | केहीबेर प्रहरीसंगको भनाभनमा उनले हातपातको प्रयास समेत गरेको जिल्ला प्रहरी कार्यालयका प्रबक्ता डिएसपी प्रतिक राठौरले बताए |

रामबाबू भेष नै बदलेर सहयोगी लिएर भाग्दै गरेको सूचना आएपछि प्रहरीले एम्बुस थापेर गरेको डिएसपी राठौरले बताए |