असन्तुष्टको दबाबपछि निर्णय सच्याउन देउवा तयार

काठमाडौं-असन्तुष्ट समूहको निरन्तरको दबाबपछि कांग्रेस सभापति शेरबहादुर देउवा निर्णय सच्याउन तयार देखिएको आजको राजधानी दैनिकले समाचार छापेको छ |

गत ११ पुसको केन्द्रीय समिति बैठकबाट बहुमतको निर्णयमार्फत पार्टीको १४औं महाधिवेशनको कार्यतालिका ल्याएका देउवा असन्तुष्ट समूहको निरन्तरको दबाब पछि निर्णय सच्याउन तयार देखिएको समाचारमा जनाइको हो |

असन्तुष्ट समूहले केन्द्रको आफ्ना तर्फको दबाबबाट नपुगेपछि पार्टी केन्द्रीय कार्यालय सानेपामा जिल्ला सभापतिहरूलाई बोलाएर निर्णय फिर्ता गर्न दबाब दिँदै आएका छन् । सोमबारबाट सुरु सभापतिको भेला मंगलबारसमेत सकिएको छैन ।

कांग्रेस सहमहामन्त्री डा. प्रकाशशरण महतले पार्टी केन्द्रीय समिति बैठकमार्फत भएको निर्णयमा केही परिमार्जन गर्न सभापति तयार रहेको बताए ।

‘महधिवेशनको विषय सबैले उठाएकै विषय हो, केन्द्रीय समितिबाट छलफल गरौं भनेकै हो । उहाँहरू बैठकमै आउनुभएन,’ कांग्रेस सहमहामन्त्री महतले राजधानीसँग भने, ‘अझै पनि महाधिवेशनको कार्यतालिकाका विषयमा केही हेरफेर गर्न सभापति तयार हुनुहुन्छ ।’

सहमहामन्त्री महतले पार्टीको बैठकबाट भएका विषयलाई बैठकबाट नै सच्याइने बताए । तर त्यसका लागि बैठकमा आउन असन्तुष्ट समूह तयार रहनुपर्ने बताए ।