कांग्रेस मुख्यालयमा पाैडेल पक्षकाे शक्ति प्रर्दशन

काठमाडाैं-प्रमुख प्रतिपक्षी दल नेपाली कांग्रेसका सभापति शेरबहादुर देउवाको विरुद्धमा बहुमत जिल्ला सभापतिहरू कांग्रेस मुख्यालय सानेपामा भेला भएका छन् । 

वरिष्ठ नेता रामचन्द्र पौडेल, महामन्त्री शशांक कोइराला, नेता प्रकाशमान सिंह लगायतका नेतासँगै ४६ जना जिल्ला सभापतिहरू भेलामा उपस्थित भएका हुन् । भेलामा देउवानिकट सभापतिहरू भने उपस्थित भएनन् ।

अधिकांश जिल्ला सभापतिले पुस ११ गते बसेको पार्टी केन्द्रीय समितिको बहुमतले विधानका कतिपय धाराहरू निलम्बन गरेको भन्दै त्यसलाई नसच्याए राम्रो नहुने चेतावनी पार्टी नेतृत्वलाई दिएका छन् ।

सोमवार आफ्नो धारणा राखेका १४ मध्ये अधिकांश जिल्ला सभापतिहरूले वरिष्ठ नेता पौडेललाई सभापतिको एकलौटीका विरुद्ध उभिँदा खुट्टा नकमाउन आग्रह गरे । २ दिनका लागि बोलाइएको भएतापनि भेला थप केही दिन लम्बिन सक्ने नुवाकोट जिल्ला सभापति जगदिश्वर नरसिंह केसीले  बताए ।

धादिङ जिल्ला सभापति रमेश धमलाले महासमिति बैठकको निर्णय खारेज गर्ने अधिकार सभापति देउवालाई नभएको दाबी गरे ।  धमलाले एकलौटी गर्न खोज्ने हो भने महासमितिको बैठक बोलाउन सभापति देउवालाई चुनौती दिए।