सामाजिक संजालमा कडा नियम लागु हुदैँ

काठमाडौं- सामाजिक सञ्जाल प्रयोगकर्तालाई लागु हुने गरी संसदको विकास तथा प्रविधि समितिले ‘सूचना प्रविधिसम्बन्धी विधेयक’ बहुमतले पारित गरेको छ। विधेयकअनुसार कसैले कसैलाई जिस्क्याए मात्र पनि १० लाख रुपैयाँसम्म जरिवानाको भागिदार बन्नुपर्ने छ।

अब विधेयक प्रतिनिधिसभामा पेश हुनेछ, दुबै सदनले उक्त विधेयक पारित भए कानून बनेर आउनेछ र कुनै व्यक्तिलाई जिस्क्याउने, होच्याउने, घृणा गर्ने, चरित्र हत्या गर्ने वा गाली बेइज्जती मानिने विषयवस्तु सामाजिक सञ्जालमा सम्प्रेषण गरेमा पाँच बर्षसम्म कैद र १५ लाखसम्म जरिवाना हुने हुनेछ।

विधेयकको दफा ८३ अन्तर्गत साइबर बुलिङ गर्न नहुने खण्डमा कसैले विद्युतीय प्रणालीको प्रयोग गरी अर्को व्यक्तिलाई हैरानी गर्ने, जिस्क्याउने, होच्याउने, अपमान गर्ने कार्य गरे कसुरको मात्रा हेरी १० लाख रुपैयाँसम्म जरिवाना, पाँच वर्षसम्म कैद वा दुवै सजाय हुने उल्लेख छ। प्रचलित कानूनले सामान्य प्रकृतिको अपराधमा समेटे पनि सूचना प्रविधि विधेयकले भने कडा जरिवानाको प्रावधान राखेको हो।