देशभर बढ्याे जाडाे,कठ्यांग्रिएर जनकपुरधाममा एकको मृत्यु

जनकपुर-अत्यधिक जाडोका कारण कठ्यांग्रिएर जनकपुरधाममा एकजना महिलाको मृत्यु भएको छ ।

मृत्यु हुनेमा जनकपुरधाम २३ का ४८ वर्षीया अनिता कापर छिन । अत्याधिक जाडोका कारण घरमै उनको मृत्यु भएको धनुषा प्रहरीले जानकारी दिएको छ ।

जाडोका कारण जनकपुरधाम क्षेत्रकोे जनजीवन अत्यधिक प्रभावित भएको छ । बजारमा चहलपहल घटेको छ भने स्थानीयवासी आगो तापेर दिन विताइरहेका छन् ।

गत डेढसातादेखि जनकपुरधाम क्षेत्रमा शितलहर देखिएको छ । सडकमा दिउँसै बत्ती वालेर सवारीसाधन चलाइने गरिन्छ । जाडोबाट बचाउन तातोको बैकल्पिक व्यवस्था गर्न स्थानीय राजनीतिक दलहरुले दैवीप्रकोप समिति र स्थानीय प्रशासनसँग माग गरेका छन् ।

राष्ट्रिय जनता पार्टीका महासचिव राजिव झाले जनकपुरधामको चोक चोकमा तथा ग्रामीण क्षेत्रमा पनि निःशुल्क दाउरा उपलब्ध गराइ अगेनाको व्यवस्था गर्न माग गरेका छन् ।

यसैगरी नेपाली काँग्रेस धनुषाका उपाध्यक्ष सन्तोष यादवले गरीबहरुका लागि न्यानो लुगा र कम्बलहरु वितरण गर्न समेत माग गरेका छन् । तर प्रशासनले अहिलेसम्म जाडोबाट प्रभावित जनतालाई बचाउन कुनै प्रयास शुरु गरेको छैन ।

विगतका वर्षहरुमा जिल्ला वन कार्यालयसँग समन्वय गरेर ठाउँ ठाउँमा आगो बाल्ने गरिन्थ्यो । जाडोबाट सबैभन्दा वढी विद्यालय जाने उमेरका बालबालिका प्रभावित भएका छन । विद्यालयहरुमा विद्यार्थीहरुको उपस्थिति निकै घटेको छ ।

जाडोले गाईवस्तु पनि प्रभावित भएका छन् । जाडोका कारण चरणमा समस्या भएको छ । तराई मधेसमा पुसको पहिलो साताबाट शीतलहर सुरु भएर माघको अन्तिम सातासम्म रहन्छ ।

चिसो बढेपछि रुघाखोकी, ज्वरोलगायत समस्याले पीडित हुनेको संख्या पनि बढेको चिकित्सकहरु बताउँछन् । बालबालिका र वृद्धवृद्धामा चिसोका कारण स्वास्थ्य समस्या बढी देखिएको जनकपुरधामका वरिष्ठ वाल रोग विशेषज्ञ डा. वलराम मिश्रले बताए । जाडो बढ्दै गएपछि हाडजोनी, रुघाखोकी, दम, कोल्ड डाईरियाका बिरामीहरुको संख्या बढेको उनले बताए ।