दक्षिण कोरिया अमेरिकी हतियारको चौथो ठूलो खरिदकर्ता

सोल-हालै सार्वजनिक गरिएको सरकारी तथ्याङ्क अनुसार दक्षिण कोरिया अमेरिकी हतियारको चौथो ठूलो खरिदकर्ता देश रहेको छ ।

कोरियाली प्रतिरक्षा विभागद्धारा सार्वजनिक गरिएको ‘विश्व प्रतिरक्षा बजार वर्ष पुस्तक’ का अनुसार अमेरिकाले सन् २००९ देखि २०१९ को विचमा करिव ९३.३ विलीयन अमेरिकी डलर वरावरको हतियार विश्व बजारमा विक्रि गरेको थियो जसमध्ये करिव ६.२८ विलीयन अमेरिकी डलर बराबरको हतियार दक्षिण कोरिया एक्लैले खरिद गरेको थियो ।

वर्ष पुस्तकका अनुसार अमेरिकी हतियार खरिद गर्ने देशहरुमा साउदी अरव पहिलो जसले करिव १३.४७ विलीयन अमेरीकी डलर, दोश्रो अष्ट्रेलिया (७.७६ विलीयन) तथा तेश्रो युनाइटेड अरव इमिरेट्स् (६.९२ विलीयन) रहेका छन् ।

तर पुस्तकले कुन प्रकारका हतियार हुन् भन्ने वारे केही खुलाएको छैन तर श्रोतका अनुसार दक्षिण कोरियाले खरिद गरेका सैन्य सामाग्रीहरुमा फाइटर विमान तथा मिसाइल्स हरु रहेका छन् ।

अमेरिकाले निर्यात गर्ने सैन्य सामाग्रीहरुमा सैन्य विमानहरुको मात्रा सर्वाधिक ५६.१ प्रतिशत, मिसाइल्स १६.५ प्रतिशत तथा सैन्य गाडीहरु करिव ११ प्रतिशत रहेका छन् ।

त्यसो त अमेरिकाले जर्मनी, फ्रान्स, क्यानडा तथा बेलायतबाट आफ्नो लागी हतियार तथा सैन्य सामाग्रीहरु आयात गर्ने गरेको छ । तथ्याङ्कका अनुसार सोही अवधिमा अमेरिकाले विभिन्न मुलुकबाट करिव ७.६७ विलियन अमेरिकी डलर वरावरको हतियार आयात गरेको छ ।