निमोनियाबाट बच्चालाई जोगाउने ६ तरिका

एक तथ्यांकका अनुसार संसारभर करिब १६ लाख बालबालिकाहरु निमोनियाबाट मात्र मृत्यु भएको देखिन्छ । निमोनियाले प्रति वर्ष विश्वभर १५ करोड ५० लाख बालबालिका बिरामी पर्छन् । निमोनिया ५ वर्ष मुनिका बालबालिकाहरुको मृत्युको एउटा प्रमुख कारण हो ।

५ वर्ष मुनिका बालबालिकाको मृत्यु मध्ये १५ प्रतिशत मृत्युको कारण निमोनिया हो । निमोनियाबाट बालबालाईलाई समयमै नजोगाएमा सन् २०३० सम्ममा विश्वभर १ करोड १० लाख बालबालिकाको मृत्यु हुने अनुमान गरिएको छ ।

के हो निमोनिया ?

निमोनिया भनेको फोक्सोमा हुने संक्रमण हो । निमोनिया भएमा खोकी लाग्ने, छिटोछिटो श्वास फेर्ने, ज्वरो आउने कोखा हाल्ने समस्या हुन्छ । कडा निमोनियाले बालबालिकाको मृत्यु समेत हुनसक्छ ।

निमोनियाबाट बच्चालाई जोगाउने ६ तरिका

१-बच्चाको सही हेरचाह नै रुघाखोकीबाट उनीहरूलाई जोगाउनु हो । जस्तै चिसो भन्दैमा धेरै कपडा लगाइदिन हुँदैन । चाहिनेभन्दा धेरै कपडा लगाइदिए पसिना आउँछ र त्यो शरीरमा नै सोसिन्छ । यसले झनै चिसो गराएर निमोनिया हुन सक्छ ।

२-हामीकहाँ बच्चालाई आगोमा सेकाउने चलन छ । यो एकदमै गलत काम हो । झ्यालढोका बन्द गरेर सेकाउनु झनै खतराजनक हुन्छ । धुवाँले बच्चाको फोक्सो असर गर्छ। कोइलामा सेकाउन पर्‍यो भने झ्यालढोका खुला राख्नुपर्छ । ह्यालोजन हिटरमा सेक्नु ठीक हुन्छ ।

३-जाडोमा बच्चालाई धेरै नुहाइदिन हुँदैन भन्नु पनि गलत हो । धेरै समय नुहाएन भने बच्चामा संक्रमण हुन्छ र बिरामी हुने सम्भावना हुन्छ । हप्तामा दुई पटक बच्चालाई नुहाइदिनु पर्छ । नुहाउन गाह्रो हुन्छ भने थोरै तातो पानीमा कपडा भिजाएर जिऊ पुछिदिन सकिन्छ । सके दैनिकरुपमा नभए पनि पसिना आएपछि चाहिँ कपडा फेरिदिनुपर्छ ।

४-राम्रोसँग हात धोएर, स्यानिटाइजर र मास्क लगाएर मात्र मात्रै बच्चा छुन पर्छ। रुघाखोकी लागेको छ भने ठूलो मान्छेले एन्टिबायोटिक खानुपर्छ जसले बच्चालाई संक्रमण हुनबाट जोगाउँछ। १२–१ बजेको घामले बच्चालाई हानी गर्ने हुनाले ८–९ बजे राख्नु राम्रो हुन्छ ।

५-बच्चालाई कहिले पनि फ्रिजबाट सिधै निकालेका खानेकुरा खुवाउन हुँदैन। रुघाखोकीका बेला दही र केरा नखुवाउने। सफा, तातो, झोलभएका खानेकुरा जस्तै जाउलो, दाल र गेडागुडीको रसका साथै प्रोटिन र भिटामीन सि भएका खानेकुरा खुवाउँदा बच्चाको स्वास्थ्यमा सुधार आउँछ ।

६-बच्चाले आफू बिरामी भएको आफैं व्यक्त नगर्ने हुँदा उनीहरूको दैनिक गतिविधि र आनीबानी हेर्नुपर्छ। राम्रोसँग खाना नखाने, नखेल्ने, स्याँ–स्याँ हुने जस्ता लक्षण देखिएमा बालबालिका बिरामी भएको बुझ्न पर्छ । यस्तो अवस्थामा उसलाई तुरुन्त अस्पताल लैजानपर्छ ।