कोरियाबाट राष्ट्रिय आविष्कार केन्द्रलाई सहयोग

काठमाण्डौ-दक्षिण कोरियामा रहेका नेपालीहरुले महाविर पुनद्धारा संचालन गर्न लागिएको राष्ट्रिय आविष्कार केन्दलाई्र १ लाख ६५ हजार रुपैयां सहयोग गरेका छन् ।

गजेदोस्थित पानिजहाज निर्माण कम्पनी डेउ सिपबिल्डिङ मेरिन एण्ड इन्जिनियरिङ कम्पनीमा कार्यरत नेपालीहरुको संस्था डेउ नेपाली एकता समाजको पहलमा सो रकम संकलन गरिएको हो ।

समाजका उपाध्यक्ष केशव खडका लगायतका प्रतिनीधिले सोमबार आविष्कार केन्द्रको कार्यालय ठमेलमा केन्द्रका संचालक पुनलाई हस्तान्तरण गरेका थिए ।

पुनले एकता समाज परिवारलाई सहयोग बापत धन्यवाद व्यक्त गरेका थिए । सो रकम संकलन गर्न गत शनिवार गजेदोमा नेपाली चलचित्र छक्का पञ्जा प्रदर्शन गरिएको थियो । करिब ८०० जना नेपालीहरु कार्यरत सो कम्पनीमा चलचित्र हेर्न र पुनको अभियानमा सहयोग गर्नेको उल्लेख्य रुपमा उपस्थिति रहेको गंगा फूयालले बताए ।

केन्द्रको अभियानमा सहयोग गर्न पाउदा खुसी लागेको र निरन्तर सहयोग गरिने समाजका अध्यक्ष मोहन पंडितको भनाई थियो ।