जाडोको जोखिम शिशु र वृद्धवृद्धालाई

जाडोको बेला भाइरस तथा व्याक्टेरिया सक्रिय हुन्छन। यसबाट कोल्ड डायरिया, निमोनिया, दम, बाथ, उच्च रक्तचाप, एलर्जीलगायत समस्या देखापर्ने सम्भावना बढी हुने चिकित्सक बताउँछन्।डाक्टरका अनुसार, बाहिरी वातावरणसँग शरीरको तापक्रमलाई सन्तुलनमा राख्न सक्ने सामथ्र्य नभएका शिशु र ज्येष्ठ नागरिकलाई हाइपोथर्मियाले सताउने जोखिम हुन्छ।

चिसोमा एक महिनासम्मको शिशुलाई हाइपोथर्मिया हुने डर हुन्छ। हाइपोथर्मिया भएका शिशुलाई जति खुवाए पनि हृष्टपुष्ट नहुने समस्या हुन्छ।

जाडो सिजनमा शरीरलाई ठिक्क न्यानो बनाइराख्नु पर्छ। अन्यथा शरीरका अंग नै शिथिल हुने डर हुन्छ। एउटै कोठामा गुजुमुज्ज बस्दा स्वासप्रश्वाससम्बन्धी रोग सर्ने सम्भावना बढी हुन्छ।

जाडोमा भरभित्र पनि प्रदूषण उत्पन्न भइरहेको हुन्छ। न्यून आय भएका समुदायमा घरभित्र दाउरा वा गुईंठा बास्ने चलन अझै छ। दाउरा तथा गुईंठाबाट निस्कने धुवाँले घरभित्र प्रदूषण उत्पन्न हुन्छ। कोठाभित्रै मकलमा आगो बालेर शिशुलाई सेक्ने चलन राम्रो होइन। सेकेर फाइदा छैन। धुँवा प्रदूषण हो। बच्चाले श्वास फेर्दा नाकमुखबाट भित्र पस्छ। सुत्केरी र बच्चा दुवै जनालाई फाइदा हुँदैन |

मकलमा दाउरा वा गुईँठा बालेर आगो बालेर ताप्दा धुवाँमा कार्बन डाइअक्साइड, कार्बनमोनो अक्साइड, सल्फर डाइअक्साइड लगायत विषालु ग्यास निस्केको हुन्छ। यसले वायु प्रदूषण बढाउँछ। वायु प्रदूषणमा बस्नेलाई जीवनको उत्तराद्र्धमा अल्जाइमर्स, डिमेन्सियाको समस्याले सताउने हुँदा स्वास्थ्यमा गम्भीर असर पार्छ।

धुवाँका कारण नै शिशुको मस्तिष्कको विकासमा समेत असर पुग्छ। शरीरलाई तातो बनाइराख्नु पर्छ। मुटु, फोक्सोलगायत अंग सञ्चालन हुन लागि शरीर पनि तातो हुनु पर्छ। बाहिरबाट तातो वातावरण नभएको अवस्थामा अंगले शक्ति खर्च गरेर शरीरलाई तातो बनाउनुपर्ने हुन्छ। यसो गर्दा शरीरमा सञ्चित शक्ति खर्च हुन्छ |