पाँचथर फाल्गुनन्दको अध्यक्षमा नेकपाका कुरुम्बाङ विजयी

पाँचथर-पाँचथरको फाल्गुनन्द गाँउपालिकाको अध्यक्षमा नेपाल कम्युनिष्ट पार्टी (नेकपा)का वीरबहादुर कुरुम्बाङ विजयी भएका छन् ।

आइतवार रातीे सकिएको मतगणना अनुशार कुरुम्बाङले ५ हजार ३ सय ६९ मत प्राप्त गरी विजयी भएका हुन् । उनका प्रतिद्वन्द्वी नेपाली काँग्रेसका वृजहाङ आङदेम्बेले ४५६३ मत प्राप्त गरेका थिए । कुरुम्बाङले ८०६ मतको अन्तरले विजय हाँसिल गरेका हुन् ।

समाजवादी पार्टीकी विमला आङदेम्बेले ३२० मत, संघीय लोकतान्त्रिक राष्ट्रिय मञ्चका जितेन चेम्जोङले २४० मत, राष्ट्रिय प्रजातन्त्र पार्टीका सुसुहाङ चेम्जोङले २८ मत, राष्ट्रिय प्रजातन्त्र पार्टी (संयुक्त)का मोतिप्रसाद आङदेम्बेले ७५ मत, राष्ट्रिय जनमुक्ति पार्टीका इच्छाबहादुर चेम्जोङले २८ मत, मंगोल नेशनल अर्गनाइजेसनका उदय सुनुवारले १२ मत प्राप्त गरेका छन् ।

मत गणनामा १७९ मत बदर भएको निर्वान अधिकृत नवराज दुलालले जानकारी दिए ।

गाँउपालिका अध्यक्ष अमरकुमार नेम्वाङको निधनपछि यहाँ उपनिर्वाचन भएको हो । यसअघि नेपाली काँग्रेसले जितेको यस गाँउपालिकाका साविकका धेरै गाविसहरुमा विगतमा काँग्रेसको उपस्थित थियो । काँग्रेसको पकड क्षेत्र मानिएको फाल्गुनन्दमा यस पटक नेकपाका कुरुम्बाङले विजय हासील गरेका हुन् ।

भ्रष्टाचार, बेथिति, विकास निर्माण र सेवा प्रवाहमा रहेको ढिलासुस्ती अन्त्य गर्ने उहाँको दृढ प्रतिवद्धता छ । स्थानीयको आयआर्जन वृद्धि र पूर्वाधार निर्माणमा विशेष जोड दिने कुरुम्बाङको आगमी योजना छ ।