नेपाली सीमा अतिक्रमणबारे वार्ता गरेर समाधान गर्न चीनको सुझाव

काठमाडौं-नेपाली भूभाग कालापानी क्षेत्र अतिक्रमणबारे अर्को छिमेकी चीनले एक सातापछि मुख खोलेको छ। चिनियाँ विदेश मन्त्रालयका प्रवक्ता जेन सुहाङले नियमित पत्रकार भेटघाटमा कालापानी अतिक्रमणबारे आएको जिज्ञासामा उत्तर दिँदै भने, ‘कालापानी क्षेत्रबारे नेपाल र भारतले शान्तिपूर्ण मित्रवत वार्ता गरेर समाधान खोज्न आवश्यक छ।’यो समाचार आजको अन्नपूर्ण दैनिकले छापेको छ |

समाचार अनुसार जम्मु-कश्मीर र लद्दाखलाई छुट्याएर केन्द्र शासित प्रान्त बनाएपछि भारतले जारी गरेको नयाँ नक्सामा नेपालको कालापानी क्षेत्रलाई समेत पारेको थियो। त्यसबारे समाचार बाहिर आएपछि भारतको उक्त कदमबारे चर्को विरोध भइरहेको छ। सरकारले पनि एकपक्षीय नक्सा अस्वीकार्य भएको जानकारी दिइसकेको छ।

भारतसँग कसरी प्रस्तुत हुने भन्दै सरकाले राजनीतिक दल, बुद्धिजीवीलगायत सीमा विज्ञसँग छुट्टै छलफल गरेरसमेत परिपक्व धारणा बनाएको छ। उक्त क्षेत्र भारतले मिचेको भन्नेमा सबै राजनीतिक दल, बुद्धिजीवी एक स्थानमा उभिएर कूटनीतिक पहलबाट समाधान खोज्न सुझाव दिएका थिए।