काे काे फर्कैछन् प्रधानमन्त्रीकाे नीजि सचिवालयमा?

काठमाडाैं -प्रधानमन्त्रीको नीजि सचिवालयका सदस्यहरूमा केहि पुनः साेही पदमा फर्केन भएका छन्। प्रधानमन्त्रीकाे निर्देशनपछि २२ र २४ कात्तिकमा ११ जना सचिवालय सदस्यले राजीनामा बुझाएका । राजीनामाको एक सातासम्म पनि प्रधानमन्त्रीले नयाँ सल्लाहकार नियुक्त गरेका छैनन् । तर, सचिवालयबाट राजीनामा दिएका सहयोगीहरू भने पुरानै स्थानमा फर्कन दौडधुप गर्दैछन् ।

प्रधानमन्त्रीको प्रेस हेर्न सचिवालयमा ३ जना छन् । पत्रकारिताका गुरु कुन्दन अर्याल, पत्रकार रामशरण बजगाईं र चेतन अधिकारी ।

चेतन प्रेससँगै प्रधानमन्त्रीको भ्रमण तालिका पनि व्यवस्थित गर्छन् । स्राेतका अनुसार प्रधानमन्त्रीकै गृहजिल्लाका चेतनसँग प्रधानमन्त्री सन्तुष्ट छन् । उनी पुनः बालुवाटार फर्कने लिस्टमा छन् । तर बजगाँइ भने नफर्कने भएका छन् ।

प्रधानमन्त्रीको स्वास्थ्य अपडेटलगायतका सूचना सम्प्रेषणका कारण विवादमा पर्दै आएका कुन्दन अर्याल राजनीतिक सल्लाहकार विष्णु रिमालसँगको टक्करका कारण सचिवालयबाट बाहिरिँदैछन् ।

रिमाललाई ओलीले नेताभन्दा बढी व्यवस्थापकका रूपमा विश्वास गरिरहेका छन् । यही कारण नयाँ टिममा पुरानै भूमिकामा फर्कने तयारीमा छन् रिमाल । तर, बालुवाटार स्राेतका अनुसार राजनीतिक सल्लाहकारमा नेकपाका मन्त्री भइसकेका केही नेताको नाममा पनि छलफल भने चलिरहेको छ ।

राजीनामा दिएर बसेका जनसम्पर्क सल्लाहकार अच्युत मैनाली र विकास विज्ञ घनश्याम भट्टराई भने बालुवाटार नफर्कनेको लिस्टमा छन् । दुवैको कामप्रति प्रधानमन्त्रीले लामै समयदेखि असन्तुष्टि जनाइरहेका कारण उनीहरूको पुनरागमनको सम्भावना नभएको स्राेतको दाबी छ ।

प्रधानमन्त्रीको सचिवालयमा फर्कने बलिया दाबेदार विष्णु रिमाल र चेतन अधिकारी हुन् । उनीहरूसँगै परराष्ट्र सल्लाहकार राजन भट्टराई, आईटीविज्ञ अस्गर अली, स्वकीय सचिव इन्द्र भण्डारी र फोटोग्राफर कृष्ण पौडेल पनि सचिवालयमा पुनः नियुक्ति पाउने लिस्टमा छन् ।

उनीहरूको कामबाट प्रधानमन्त्रीको खास असन्तुष्टि नरहेका कारण पुनः बालुवाटार फर्कने सम्भावना रहेको स्राेतको दाबी छ ।