प्रहरी र सरकारी वकिलहरुको सम्मेलन हुने

काठमाडौँ-नेपालका अनुसन्धानकर्ता प्रहरी र अभियोजनकर्ता सरकारी वकिलहरुको राष्ट्रिय सम्मेलन हुने भएको छ |

महान्यायाधिबक्ताको कार्यालय र प्रहरी प्रधान कार्यालयको संयुक्त आयोजनामा माघ १४, १५ र १६ गते काठमाडौंमा प्रथम सम्मेलन हुन लागेको बुधबार नेपाल पुलिस क्लव भृकुटीमण्डपमा आयोजित पत्रकार सम्मेलनमा जानकारी गराइएको थियो |

तीन दिने सम्मेलनले अपराध नियन्त्रण तथा कानूनी शासन स्थापना गर्न थप सजिलो हुने महान्यायाधिवक्ता रमनकुमार श्रेष्ठले पत्रकार सम्मेलनमा बताएका थिए | सो अवसरमा पत्रकारहरुको जिज्ञासा निरुपण गदै महान्यायाधिबक्ता श्रेष्ठले प्रहरी र सरकारी वकिलबीच एउटै धारणा, आपसमा समन्वयकारी भूमिका र सहकार्य गर्नु आवश्यक भएको उल्लेख गरे ।

पत्रकार सम्मेलनमा प्रहरी महानिरीक्षक उपेन्द्रकान्त अर्यालले सम्मेलनको अवधारणा र उद्धेश्यबारे प्रकाश पार्दै फौजदारी मुद्धाका अनुसन्धान अधिकृत प्रहरी र अभियोजनकर्ता सरकारी बकिलहरु लामो समयदेखि काम गर्दै आएको सन्दर्भमा आइपर्ने असमझदारी, अन्योल, समस्या र अप्ठेराहरुलाई सम्मेलनले व्यापक छलफल गरी मार्गनिर्देश गर्ने विश्वास व्यक्त गरे ।

‘प्रभावकारी अनुसन्धान र अभियोजन, सुदृढ फौजदारी न्याय प्रशासन’ नारा रहेको प्रधानमन्त्री पुष्पकमल दाहाल ‘प्रचण्ड’ले माघ १४ गते राष्ट्रिय सभागृह भृकुटीमण्डपमा उदघाटन गर्ने कार्यक्रम रहेको छ |

उक्त सम्मेलनमा सरकारबादी फौजदारी मुद्धाको अनुसन्धानकर्ता नेपाल प्रहरीका अनुसन्धान अधिकृतहरु, अभियोजनकर्ता सरकारी वकिलहरु, विधिविज्ञान विज्ञ समेतका सरोकारवाला निकायका प्रतिनिधिहरु तथा महान्यायाधिबक्ताको कार्यालय र प्रहरी प्रधान कार्यालयबाट तोकिएका करीव ५ सय ३५ जनाको सहभागिता रहने पत्रकार सम्मेलनमा जानकारी दिइयो ।