प्रधानमन्त्रीको सुरक्षाकर्मी नै जुवाखालबाट पक्राउ

काठमाडौं-प्रधानमन्त्री केपी शर्मा ओलीको सुरक्षा टोलीका बरिष्ठ सुरक्षा अधिकारी जुवाखालबाट पक्राउ परेको नयाँ पत्रिकाले समाचार छापेको छ |

नेपाली सेनाका मेजर (सेनानी) राजेन्द्र शाहीलाई प्रहरीले शुक्रबार साँझ जुवा खेलीरहेको अवस्थामा सामाखुसीबाट पक्राउ गरेको हो |

महानगरीय प्रहरी प्रभाग गोंगबुबाट खटिएको प्रहरी टोलीले सामाखुसीस्थित सोमबहादुर मगरको घरबाट शाहीसहित आठ जनालाई पक्राउ गरेको हो।

पक्राउ पर्ने अन्यमा घरधनी मगर, रामेछापका बुद्धिलाल मगर, गोरखाका जित गुरुङ र किरणजंग शाह, टोखाका मानकाजी गुरुङ र धर्म शाह, तथा सुर्खेतका निरज राणा छन्।

उनीहरुको साथबाट एक लाख ५९ हजार तीन सय रुपैयाँ पनि बरामद भएको प्रहरीले जनाएको छ।

उनीहरुलाई म्यारिज खेलिरहेको अवस्थामा पक्राउ गरिएको महानगरीय प्रहरी वृत्त महाराजगञ्जका डिएसपी उमेश लम्सालले बताए।