पार्टी फुटाउन र नेताहरुलाई लडाउन हजार दाउ खोजिरहेका छन् -अध्यक्ष प्रचण्ड

काठमाडौँ-नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले देशको आर्थिक, सामाजिक र राजनीतिक विकासका लागि शिक्षा नीतिमा व्यापक सुधार आवश्यक रहेको बताएका छन् ।

चन्द्रागिरि नगरपालिका–१५ तीनथानमा आज आयोजित ‘वडाध्यक्ष शौक्षिक विकास कोषको दोस्रो वार्षिक उत्सव तथा साधारणसभा’को उद्घाटन कार्यक्रममा प्रचण्डले शिक्षामा बजेट पर्याप्त नभएकाले शिक्षाको नीतिमा आमूल सुधार गर्न नसकिएको बताए ।

‘हामीले देशको शिक्षा प्रणालीलाई वैज्ञानिक तवरबाट आयआर्जन र विकासमुखी बनाउनकै लागि शिक्षामा पर्याप्त लगानी आवश्यक छ, देशको विकास र सुधार शिक्षाबाटै हुन्छ, नीतिगत सुधार र बजेटमा सुधार गर्न सकिए देश आर्थिक समृद्धितर्फ उन्मुख हुने निश्चित छ,’ अध्यक्ष दाहालले भने ।

अध्यक्ष दाहालले विरोधीहरु पार्टी फुटाउन र नेताहरुबीच झगडा लगाउन हजार दाउ खोजिरहेका छन् भन्दै एकताको रक्षा गर्ने दायित्व नेता र कार्यकर्ताको साझा भएको उल्लेख गरे । सत्तरी वर्षदेखि लडेर ल्याएको परिवर्तन संस्थागत गर्नु हाम्रै जिम्मेवारी र दायित्व भएको उनको भनाइ थियो ।

प्रतिनिधिसभा सदस्य कृष्णगोपाल श्रेष्ठले सङ्घीय लोकतान्त्रिक गणतन्त्र संस्थागत गर्न सबै लाग्नुपर्ने बतार । ‘हामी आफैले ल्याएको व्यवस्थाको रक्षा र कार्यान्वयन गर्न गम्भीर हुनुपर्छ,’ उनले भने ।

चन्द्रागिरि नगरपालिका–१५ का वडाध्यक्ष उत्तमबहादुर राउतले प्राप्त उपलब्धिलाई संस्थागत गर्न अगाडि बढ्नुपर्ने बेला आएको बताए ।

कार्यक्रममा विभिन्न विषयमा विद्यावारिधि गरेका १५ जना, एसइईमा उत्कृष्ट अङ्क ल्याउने तथा खेलकूदका माध्यमबाट महत्वपूर्ण योगदान पु¥याएका विभिन्न व्यक्तिलाई सम्मान गरिएको थियो ।