नेपालकै पहिलो सुरुङमार्गको शिलान्यास आज

काठमाडौँ -सडक पूर्वाधारमा महत्वपूर्ण संरचना मानिएको नेपालकै पहिलो नागढुङ्गा–सिस्नेखोला सुरुङमार्गको शिलान्यास हुने भएको छ ।

सुरुङमार्गको शिलान्यास आज अपरान्ह चन्द्रागिरि नगरपालिका–१ टोटेपाखामा प्रधानमन्त्री केपी शर्मा ओलीले गर्ने कार्यक्रम रहेको छ |

जापान अन्तरराष्ट्रिय सहयोग नियोग (जाइका)को ०.०१ प्रतिशत सहुलियत ऋण सहयोगमा साँढे दुई वर्षअघिदेखि सुरुङमार्ग निर्माण प्रक्रिया शुरु भएको थियो । यसका लागि रु २२ अर्ब लाग्नेमा जाइकाले रु १६ अर्ब सहयोग गर्ने र रु छ अर्ब नेपाल सरकारले आन्तरिक स्रोतबाट परिचालन गर्ने नागढुङ्गा सुरुङमार्ग निर्माण गर्न लागिएको हो |

प्रवेश मार्गसहित ५.५६ किमी सुरुङ मार्ग निर्माणले नेपालको पूर्वाधार विकासमा महत्वपूर्ण योगदान पुग्ने विश्वास गरिएको छ |

काठमाडौँको चन्द्रागिरि नगरपालिका–१, ३ र ५ का पीडितलाई ६ अर्ब रुपैयाँ मुआब्जा वितरण गरिने र हालसम्म मुआब्जा वितरणको ८५ प्रतिशत काम सम्पन्न भएको आयोजनाले जनाएको छ |

सुरुङ मार्ग चार वर्षमा निर्माण सम्पन्न गर्ने लक्ष्य राखिएको छ ।