दक्षिण कोरियाले निरन्तर आर्थिक सहयोग गर्ने

काठमाडौं-नेपालका लागि दक्षिण कोरियाली नवनियुक्त राजदूत पार्क योङ सिकले नेपालको आर्थिक विकासमा कोरियाको निरन्तर सहयोग रहने बताएका छन् ।

राजदूत पार्कले दुई देशबीचको व्यापार तथा लगानी प्रवर्द्धनले सम्बन्ध अझ प्रगाढ हुने विश्वास गरेका छन् । नवनियुक्त राजदूत सिकले नेपाल चेम्बर अफ कमर्शले शनिवार आयोजना गरेको स्वागत तथा छलफल कार्यक्रममा उक्त भनाइ राखेका हुन् ।

सो अवसरमा चेम्बरका अध्यक्ष राजेशकाजी श्रेष्ठले चेम्बरले आगामी नोबेम्भर ३० देखि डिसेम्बर ४ तारीखसम्म आयोजना गर्ने नेपाल चेम्बर एक्स्पोका लागि सहयोग गर्न आग्रह गरेका छन् ।

श्रेष्ठले नेपाल र कोरियाबीच सुमधुर सम्बन्ध रहेको धारणा व्यक्त गर्दै दुई देशबीच व्यापार, पर्यटन, कृषि एवम् लगानी प्रवर्द्धनमा विशेष जोड दिए । कार्यक्रममा चेम्बरका पदाधिकारी तथा कार्यसमितिका सदस्यहरूको उपस्थिति थियो ।