दक्षिण कोरियामा आँधीका कारण १० को मृत्यु

सोल– दक्षिण कोरियाको विभिन्न ठाउँमा आएको आँधीका कारण कम्तीमा १० जनाको मृत्यु भएको छ भने ४ जना अझै बेपत्ता छन् |

सरकारी अधिकारीहरुले दिएको जानकारी अनुसार आँधीका कारण हराइरहेकाको खोजी कार्य भइरहेको छ ।

राति आएको आँधीसँगै देशका विभिन्न स्थानमा अत्यधिक बर्षा पनि भएको छ । देशको दक्षिणी क्षेत्रमा बुधबार राति आँधी आएको थियो भने बाढी, पहिरोको चेतावनी समेत दिइएको थियो ।

आँधीका कारण मृत्यु हुनेमा एक जना ७० बर्षिया महिला रहेको अधिकारीहरुले जनाएका छन् । देशको दक्षिणपूर्वी क्षेत्रमा पर्ने पोहाङमा उहाँलाई शक्तिशाली हावाले उडाएको थियो ।

अत्यधिक बर्षाका कारण भत्किएको घरले पुरिएर अर्की एक महिलाको मृत्यु भएको समाचारमा जनाइएको छ । उहाँको घरमै सुतिरहेका बेला मृत्यु भएको गृह तथा सुरक्षा मन्त्रालयले जनाएको छ ।

त्यसैगरि बुसानमा रहेको एउटा सानो रेस्टुराँकी ६५ वर्षीया मालिक्नी पहिरोले पुरेको ७ घण्टापछि बेलुका ४ बजे मृत अवस्थामा फेला परेकी थिइन् ।

अरूको पनि देशका विभिन्न ठाउँमा मृत्यु भएको छ । मृत्यु हुनेको संख्या अझ बढ्न सक्ने मन्त्रालयले अनुमान गरेको छ ।

प्रभावित क्षेत्रमा ६ सय भन्दा धेरै उद्धारकर्मीहरु खटिएका छन् । उनीहरुले विपद्मा परेका नागरिकको खोजी तथा उद्धार गरिरहेका छन् । उनीहरुले कम्तीमा चार जना भग्नाबशेषमा पुरिएको अनुमान् गरेका छन् ।