पाउलान् त पर्यटन मन्त्रीकाे घाेषणा अनुसार जेष्ठ नागरिकले हवाई भाडामा ५० प्रतिशत छुट?

काठमाडाैं-संस्कृति, पर्यटन तथा नागरिक उड्डयन मन्त्री योगेश भट्टराईले राहत दिन खोजेका जेष्ठ नागरिकलाई हवाई यात्रा झन् महंगो पर्ने भएको छ । मन्त्री भट्टराईले जेष्ठ नागरिकलाई हवाई भाडामा ५० प्रतिशत छुटको व्यवस्था गर्ने घोषणा गरेका थिए ।

वायुसेवा संचालकहरुले जेष्ठ नागरिकलाई हवाई भाडामा ५० प्रतिशत छुट दिन शर्त तोकेपछि यस्तो अवस्था आएको हो । वायुसेवा संचालकले तोकिएको अधिकतम भाडादरमा मात्रै ५० प्रतिशत छुट दिने निर्णय गरेका छन् ।

वायु सेवा संचालक संघको विहीबार (९ असोज) बसेको संचालक समिति बैठकले तोकिएको अधिकतम भाडादरमा ५० प्रतिशत छुट दिने निर्णय गरेको छ ।

‘छुट सुविधा ‘अपर लिमिट’को हवाई भाडादरमा मात्र लागू हुनेछ,’ संघले गरेको निर्णयमा उल्लेख छ ।