नेपाली कांग्रेसकाे केन्द्रिय समितिकाे बैठक आज,गुण्डा नाइके गणेश लामा केन्द्रीय सदस्य बन्दै

काठमाडाैं-नेपाली कांग्रेसले गुण्डा नाइके गणेश लामालाई केन्द्रीय सदस्य बनाउने भएको छ।
लोकतान्त्रिक फोरमबाट कांग्रेसमा आएका नेताको व्यवस्थापन गर्ने क्रममा लामालाई केन्द्रीय समितिमा मनोनित गर्न लागिएको हो।

शुक्रबार बस्ने केन्द्रीय समितिको बैठकले लामा सहित ११ जनालाई केन्द्रीय सदस्य बनाउन लागेको हो।
निर्वाचन अघि कांग्रेसमा विलय भएको लोकतान्त्रिकका नेता तथा कार्यकर्ताले जिम्मेवारी पाएका थिएनन्। तत्कालिन फोरम लोकतान्त्रिकका अध्यक्ष विजय गच्छदारले उपसभापति तथा संसदीय दलको उपनेता पाएका छन्। केन्द्रीय समितिमा १५ सदस्यको दाबी गर्दै आएका गच्छदारलाई ११ जना दिएर चित्त बुझाउन लागिएको छ।

आज बस्ने केन्द्रीय समितिको बैठकले पूर्व फोरम लोकतान्त्रिकका नेता तथा कार्यकर्ताको व्यवस्थापन गर्ने बताइएको छ। साथै, विघटित भई निश्क्रिय रहेको नेपाल विद्यार्थी संघको तदर्थ समितिका विषयमा पनि छलफल गर्ने भएको छ ।
बैठक पार्टी केन्द्रीय कार्यालय सानेपामा विहान ११ बजे बोलाइएको छ।