२३ वर्षपछि चीनका राष्ट्रपति नेपाल आउने

काठमाडौं – चीनिया राष्ट्रपति सी जिनफिङ असोज २७ गते दुई दिने नेपाल भ्रमणमा आउने भएका छन्। लामो समयको प्रतिक्षापछि चीनियाँ राष्ट्रपतिको भ्रमण हुन लागेको परराष्ट्र मन्त्रालय श्रोतले जानकारी दिएको छ।

राष्ट्रपति सी को नेपाल भ्रमणको तयारीमा नेपाली र चीनियाँ पक्ष तयारीमा जुटेका छन्। चीनियाँ टोलीले काठमाडौंको भौगोलिक अवस्थाका विषयमा अहिले अध्ययन गरिरहेको श्रोतको दाबी छ। सुरक्षा संवेदनशीलताका कारण भ्रमणको मिति र तालिका औपचारिक रूपमा सार्वजनिक गरिएको छैन। 

राष्ट्रपति  सीको भ्रमणका क्रममा बहुचर्चित नेपाल-चीन जोड्ने रेलमार्गबारेमा पहिलो पटक औपचारिक सहमति गर्ने नेपाल सरकारको तयारी छ। दुई दिने नेपाल भ्रमणका क्रममा काठमाडौं-केरुङ रेलमार्ग लगायतका विभिन्न विषयमा सम्झौता हुने बताइएको छ।

२३ वर्षयता चीनियाँ राष्ट्रपतिले नेपालको भ्रमण गरेका छैनन्। शनिबार चीनियाँ कम्युनिष्ट पार्टीका विदेश विभाग प्रमुख सोङ ताओ काठमाडौं आउँदै छन्। उनको भ्रमणलाई राष्ट्रपतिको भ्रमणको तयारीको रूपमा लिइएको छ।