राजतन्त्र ब्यूँताउने सपना नदेख्नु – उपप्रधानमन्त्री पोखरेल

काठमाडौ-उपप्रधान तथा रक्षामन्त्री ईश्वर पोखरेलले राजतन्त्र ब्यूँताउने सपना देखेर नसल्बलाउन चेतावनी दिएका छन ।

उपप्रधानमन्त्री पोखरेलजनताले मिल्काइसकेको राजतन्त्र कहिल्यै नब्युँतिने बताए |

‘जनताको बलिदान र त्यागले प्राप्त नेपालको संविधान विश्वकै उत्कृष्ट छ’, मन्त्री पोखरेलले भने , ‘मिल्काइसकेको राजतन्त्रको सपना देखेर अब कोही नसल्बलाए हुन्छ ।’

झापाको विर्तामोडमा नेपाल कम्युनिष्ट पार्टी (नेकपा) झापाले आयोजना गरेको पाँचौँ संविधान दिवस कार्यक्रमलाई सम्बोधन गर्दै उपप्रधानमन्त्री पोखरेलले जनताबाट निर्वाचित भएका ९० प्रतिशत जनप्रतिनिधिले अनुमोदन गरेको संविधानको कार्यान्वयनमा सरकार दृढतापूर्वक अघि बढेको बताए ।

भ्रष्टाचारलाई पनि सरकारले नसहने उल्लेख गर्दै , ‘भ्रष्टाचारीको जालो अब धेरै दिन टिक्दैन, सरकारले उनीहरुलाई छाड्ने छैन ।’

कार्यक्रममा पार्टीका स्थायी कमिटी सदस्य हरिबोल गजुरेलले झापा राजनीतिक जागरणको केन्द्रविन्दु रहेकाले जनतालाई भड्काएर आफ्नो अभिष्ट पूरा गर्न गणतन्त्र विरोधी यहीँबाट सल्बलाउन थालेको बताए |

कार्यक्रममा १ नम्बर प्रदेशका इञ्चार्ज भीम आचार्य, केन्द्रीय सदस्य सुरेन्द्र कार्की, सांसदहरु धर्मशीला चापागाईं, जसमाया गजमेरलगायतले संविधान दिवसमा शुभकामना व्यक्त गरेका थिए |