सरकारका काम सन्तोषजनक नभएको प्रधानमन्त्रीद्वारा स्वीकार

काठमाडौँ-सरकारको कामका विषयमा आलोचना भइरहेका बेला  प्रधानमन्त्री केपी शर्मा ओलीले समेत आलोचना जायज नै भएको बताएका छन् ।

सिंहदरबार परिसरमा निर्माण हुने संघीय संसद भवनको बुधबार बिहान शिलान्यास गरेपछि प्रधानमन्त्री ओलीले सरकारको कामले जनचाहना अनुरुप गति लिन नसकेको स्वीकार गरेका हुन्।

‘कामको गति सुस्त भयो भनेर भइरहेका गुनासाहरु जायज छन्। देशको विकासले गति लिन नसकेको हो। सरकार यी गुनासाहरुप्रति गम्भीर छ,’ प्रधानमन्त्री ओलीले भने, ‘यो सरकारको डेढ वर्षको अवधि खासै सन्तोषजनक नरहे पनि अब बाँकी समयमा कामको गति तीव्र हुन्छ। सरकारले अझै गति लिन नसकेको अवस्थालाई चिरेर हामी अघि बढ्दै छौँ। अब सरकारका काम देखिँदै जाने छन्।’