आठौँ कोरियन भाषा परीक्षाका लागि हालसम्म ७४ हजारले आवेदन गरे,८० हजार पुग्ने सम्भावना

काठमाडौं – रोजगार अनुमति प्रणाली (ईपीएस ) मार्फत कोरिया जान चाहने नेपाली युवाहरुको संख्या हरेक बर्ष बढ्दै गएको छ | आठौँ कोरियन भाषा परीक्षाका लागि शुक्रबार दिउसो १.३० बजेसम्ममा ७४ हजार बढीले आवेदन गरेका छन् |

ईपीएस शाखा नेपालका अनुसार उत्पादनमुलक क्षेत्र तर्फ २३ हजार र कृषि तथा पशुपालन क्षेत्र तर्फ ५० हजार बढीको आवेदन परेको छ | यो संख्या हाल सम्मकै धेरै हो |

यो बर्ष देखि अनलाईन मार्फत फारम भर्न मिल्ने व्यवस्था मिलाईएको छ | फारम रजिष्ट्रेशनमा समस्या देखिए आवेदन भर्ने समय थप गर्ने भनिए पनि फारम रजिष्ट्रेशनमा समस्या नदेखिएकाले समय थप नहुने ईपीएस शाखा नेपालका निर्देशक बाबुराम खतिवडाले बताए |

आवेदन फारम भर्दा फोटो र पासपोर्टलगायतका कागजात प्रस्ट नभएका आवेदनले चैत २० देखि २५ गतेसम्म सच्याउन सकिने पनि ईपिएस शाखा नेपालले जनाएको छ |