नेपाली सांगीतिक क्षेत्रमा कपिलको अभियान

काठमाडौं-नेपाली गीत संगीतको क्षेत्र दिनै उर्बर बन्दै गएको छ । यस क्षेत्रका साधकहरुको अविरल साधनले पनि नेपाली सांगीतिक क्षेत्र मलिलो फाटिलो र उर्बर हुने गरेको हो । बिगत पन्ध्र वर्षादेखि यस्तै साधनामा तल्लिन छन् भक्तपुरका कपिल कसपाल ।

गीत गाउन भने पछि सानैदेखि हुरुक्क हुने कपिल भक्तपुरमा हुने बिभिन्ने सांगीतिक कार्यक्रममा नछुट्ने गायक हुन् । उनले बिभिन्न जिल्लाहरुमा पुगेर आफ्ना फेनहरुलाई मनोरन्जन दिएका छन् । पहिलो गीत ‘न जोखेर जोखिन्छ, न कतै पोखिन्छ’ २०६६ सालमा रेकर्ड गरेका थिए । त्यस यता दर्जनौ गीत लेख्दै, गाउदै र आफै संगीत भर्दै आएका उनि पछिल्लो समय आफ्ना गीतहरुलाई म्युजिक भिडियो बनाउनेतिर आकर्षित बन्दै गएका छन् । हालसम्म करिब आधा दर्जन गीतलाई भिडियो बनाइ सकेका छन् ।

कपिलका ‘मेरो माया तिमीलाई, तिम्रो माया अरुलाई, मौसम पनि रमाइलो छ, रसिलो ओठको रस पिउन मन लाग्यो’ जस्ता गीतहरु नेपाली सांगीतिक आकाशमा चर्चित छन् । विश्वमा प्रविधिले ल्याएको परिवर्तन र बहुल समाजको प्रकृतिलाई समेत ‘चिठी र तारको गयो जमाना, खुलम खुल्ला प्यारको हो यो जमाना’ भन्ने गीतमा ब्यक्त गरेका छन् ।

बिगत केहि बर्षदेखि ८७.९ मेगाहर्जको रेडियो मस्तीमा स्वास्थ्य सम्बन्धी टिप्स दिंदै आएका उनि असल मन नेपालका संस्थापक अध्यक्ष पनि हुन् । सबै गीतलाई म्युजिक भिडियो बनाउने र नयां बर्षमा एल्बम लिएर फ्यान सामु आउने योजना बनाइ रहेका छन् ।

‘हाम्रो शिवानी’, ‘जय होस’ लगायत केहि टेली शृंखलामा समेत अभिनय गरेका कपिल संगीत क्षेत्रमा लागेका नवप्रतिभाहरुलाई सहजै आफ्नो स्वर दिएर सहयोग गर्ने योजनामा छन् । उनि भन्छन ‘नेपाली सांगीतिक क्षेत्रमा भक्तपुरबाट बिशेष योगदान पुर्याउने अभियानमा छु ।’