नेपालमा अबैधानिक रुपमा बसेका १४ उत्तर कोरियनलाई भिसा थप्न लबिङ

काठमाडौं-नेपालमा भिसा सकिएर अबैधानिक बसेका १४ उत्तर कोरियाली नागरिकको भिसा थप्न लबिङ्ग गरिएको छ ।

उत्तर कोरियाली लगानीमा सञ्चालित दरवारमार्गस्थित राइजिङमलको माथिल्लो तलामा रहेको बोतोङगाङ्ग रेष्टुरेन्ट एण्ड बार प्रालिमा कार्यरत १४ जना उत्तर कोरियाली कामदारको भिसा अबधि थप गर्न उत्तर कोरियाली दूताबासले लबिङ गरेको हो ।

राष्ट्रसंघले गत साउनमा बाध्यकारी नाकाबन्दी कार्यान्वयन गर्न नेपाल सरकारलाई पत्राचार गरेसंगै उत्तर कोरियालीमाथि सरकारले कडाइ गरेर १४ जना उत्तर कोरियाली नागरिकको भिसाको म्याद थप गरेको थिएन ।

चिनियाँ लगानीकर्ताबाट उत्तर कोरियालीले खरिद गरेको बोतोङगाङ्ग रेष्टुरेन्टमा काम गर्ने १४ जना कामदारको गत जुन ६ मा नै भिसाको म्याद सकिएपनि अवैध रुपमा काम गरिरहेका हुन् ।

१४ जना मध्य डिपेन्डेन्ट भिसामा काम गरिरहेका ५ जना उत्तर कोरियालीले भिसाको म्याद थप भएपछि पर्यटन भिसा लिएका थिए । उनीहरुको पर्यटन भिसाको पनि अगष्ट १३ मा म्याद सकिएको छ ।

नेपालमा उत्तर कोरियालीलाई सहज बनाउन लबिङ गर्न नेपाली भाषामा समेत पोख्त उत्तर कोरियाली दूताबासका उपप्रमुख किम जोङ होक ले लबिङ गरेसंगै राष्ट्रसंघलाई झुक्याएर भिसा थप्ने पहल शुरु भएको हो ।

होकले उद्योगमन्त्री तथा गृहमन्त्री निकटस्थहरुसंग भेटी अगामी राष्ट्रसंघीय बैठकपछि उत्तर कोरियामाथीको नाकाबन्दी खुल्ने तथा दक्षिण कोरियासंगको सम्बन्ध सकारात्मकदिशातर्फ अघि बढिरहेकाले नेपाललाई दबाब नपर्ने भन्दै भिसाको म्याद थप्न आग्रह गरेका थिए ।

उनको लबिङपछि उद्योग विभाग हुँदै अध्यागमन फाइल पठाउने र सबै अबैध उत्तर कोरियालीलाई ब्यापारीक भिसा दिन लबिङ शुरु भएको छ ।