जापानी भाषा परीक्षाको मिति सार्वजनिक

काठमाडौं-जापानी भाषा र सीप परीक्षणमा उत्तीर्ण हुनेले जापान जान योग्य हुने भएका छन् । यहि असोज १० देखि १२, कात्तिक २१ देखि २३ र २६ देखि २८ सम्म हुने भनिएको जापानिज भाषा र सीप मूल्यांकन परीक्षा स्पेसिफाइड स्किल्ड वर्कर (एसएसडब्लु) अन्तर्गत नर्सिङ केयर गिभर परीक्षा पास हुनेले जापान जान पाउने भएका छन् ।

जापानको स्वास्थ्य, श्रम र कल्याण मन्त्रालयको सूचनाअनुसार नर्सिङ केयर स्किल इभ्यालुयसन टेष्टमा ४५ वटा प्रश्न आउने छन् जसमा ४० वटा लिखित र ५ वटा व्यवहारिक प्रश्नहरु हुनेछन् । ‘नर्सिङ केयर जापनिज भाषा इभ्यालुयसन टेष्ट’मा १५ वटा प्रश्नहरू आउने छन् । परीक्षार्थीले नर्सिङ केयर स्किल इभ्यालुएसन टेष्ट र नर्सिङ केयर जापानिज भाषा इभ्यालुएसन टेष्ट’ दुवैको लागि १/१ हजार जापानी येन शुल्क तोकेको छ ।

जापान सरकारले नर्सिङ केयर गिभरमा जान चाहनेका लागि कुनै शैक्षिक योग्यता तोकेको नभए पनि ‘नर्सिङ केयर स्किल इभ्यालुएसन टेष्ट’ र ‘नर्सिङ केयर जापनिज ल्याङ्ग्वेज इभ्यालुएसन टेष्ट’मा पास भएको हुनु पर्ने जनाएको छ।

जापानी भाषा परिक्षकले आवेदन अनलाइनमार्फत दिन सक्ने र पहिलो आवेदन दिनेलाई प्राथमिकता राख्ने जनाएको छ।

परीक्षामा आवेदनकर्ताले अनलाइन आवेदन दिनुअघि काठमाडौंस्थित जापनिज दूतावास र जापान फाउन्डेसनले तोकेको नेपालस्थित कार्यालयबाट अनिवार्य टोकन लिनुपर्ने जनाएको छ।

परीक्षाको मिति तय भइसकेपनि आवेदन निवेदन कहाँ, कहिले दिने मिति अबको केही समयमै तयगरि जानकारी दिने वैदेशिक रोजगार महाशाखाले जनाएको छ । कम्प्युटर बेस्ड टेस्टिङ (CBT) मेथडबाट लिइने परीक्षाको परिक्षाफल भने एक महिनापछि प्रकाशित हुनेछ ।

नेपाल सरकारको श्रम, रोजगार तथा सामाजिक सुरक्षा मन्त्रालयसँग २०७५ चैत  ११ गते जापानसँग भएको श्रम सम्झौता भए अनुसार नेपालबाट पहिलो पटक केयर गिभर लैजान लागिएको हो।