दक्षिण कोरियाको आईसीटी निर्यात दोब्बर वृद्धि

सोल-सन् २०१७ को फेब्रुअरी महीनामा दक्षिण कोरियाको सूचना तथा सञ्चार प्रविधि –आईसीटी) उत्पादनको निर्यात दोहोरो अङ्कले बढेको एक सरकारी प्रतिवेदनले देखाएको छ ।

सो अवधिमा स्थानीय रूपमा उत्पादित सेमिकण्डक्टरको मागमा भएको वृद्धिले निर्यात बढाउन सहयोग गरेको उद्योग, व्यापार तथा ऊर्जा मन्त्रालयले सार्वजनिक गरेको प्रतिवेदनले देखाएको छ ।

गत महीना आईसीटी निर्यात गतवर्षको तुलनामा २२ दशमलव ८ प्रतिशतले बढेर १४ अर्ब ६० करोड डलरमा उक्लिएको छ । निर्यातले १४ अर्ब डलर नाघेको यो नै पहिलोपटक हो ।

चिपको निर्यातमा भएको ५६ दशमलव ६ प्रतिशतको वृद्घिले सेमिकण्डक्टरको निर्यातलाई बढाएको हो ।

यसैगरी डिस्प्ले प्यानल निर्यात पनि १५ दशमलव ५ प्रतिशतले बढेको छ भने ह्याण्डसेटको निर्यात २५ दशमलव ९ प्रतिशतले विस्तार भएको मन्त्रालयले बताएको छ ।

गत महीना चीन र यूरोपेली सङ्घमा भएको कोरियाली निर्यात क्रमशः ३४ दशमलव १ प्रतिशत र ३७ दशमलव ९ प्रतिशतले बढेको थियो भने अमेरिकामा निर्यातले १७ प्रतिशतको कमी बेहोरेको थियो ।