खडेरी प्रभावित क्षेत्रमा कुम्मायक गाउँपालिकाद्वारा अनुगमन

पाँचथर– पाँचथरको कुम्मायक गाउँपालिकाका अध्यक्ष जयबहादुर चेम्जोङ्को नेतृत्वमा कुम्मायक गाउँपालिकाको खडेरी प्रभावित विभिन्न साबिक वडाहरुमा भाद्र १२ र १३ गते अनुगमन गरिएको छ ।

गाउँपालिकाको अधिकाङ्स सुख्खा क्षेत्र १ , २ , ३ , ४ ,र ५ का साबिक वडाहरु खाल्डे , सिम्ले , भुल्के , बिजुवापानी , थर्पु ,सङमासे , फेनाबुङ तेम्बेहिम , लोरिप्पा , हात्तिपोखरी , ताम्राखु ,सेपेनी , मेदिबुङ , देवल आसपास , तिल्के , तिङ्देन , ठाढे रानिगाउँको हाङमा वा:रक आसपास र माङ्जाबुङ्को साबिक वडा ७/८ धुप्पिङ गैरिगाउँमा अनुगमन गरिएको छ । टोलिले ८५ प्रतिशत मक्कै खेतिको उत्पादनमा गिरावट आएको अनुमान गरेको छ ।

समयमै पानी नपरेकोले यस गाउँपालिकामा मकै खेती प्रभावित भएको र फौजी नामक किरा र गभारा लागेपछी मक्कै खेती मात्र नभई अन्य बाली जस्तै कालो दाल जुनेलो बदाम तथा हिउदे बालिमा समेत यो किराको प्रकोप फैलिएको कुरा पशु स्वास्थ शाखा कार्यलय यासोकका प्राबिधिक इमकुमारी तामाङ्ले बताउनु भएको छ ।

अनुगमनमा वडा अध्यक्षहरु देबेन्द्र लावती , यामबहादुर बोहरा , राम गजुरेल पालिका सदस्य यामकुमारी खड्का , पब्लिक टाइम्सका सम्पादक तथा पत्रकार गणेश साम्पाङ राइ , स्थानीय पत्रकार रमेश थापा र पदम दु:खि सम्बाहाम्फे लगायतको टोलि रहेको थियो । उक्त टोलिले कति घरधुरी प्रभावित छन भन्ने कुरा यकिन तथ्यांक आई नसकेको कुरा जनाएको छ ।

सालमा १० देखि १५ मुरी मकै उत्पादन हुने जग्गामा यस बर्ष बैशाख र जेठ महिनामा लामो समयसम्म खडेरी लागे पछि कुनैकुनै ठाउँमा कृषकहरुले मकै छर्न समेत पाएका छैनन् भने कुनै ठाउँमा छरिएको मक्कै उमृने क्रममा घामको तापले बिरुवा नै मरेकोले बीउ समेत मासिएको कृषकहरुको दुखेसो छ ।

कृषि ज्ञानकेन्द्र बाट बितरित मकैको बीउमा पनि फौजी किरा र गभारा किरा लागेर बीउ उम्रने क्रममा कुम्मायक गाउपालिकाको अधिकाङ्स क्षेत्रमा यश बर्ष मक्कै उत्पादन शुन्य रहेकोे छ ।

आज भन्दा १३ बर्ष अगाडि यस गाउँपालिकाका मानिसको जनजीवन धान , मकै , कोदो खेतीबाट नै आत्मनिर्भर थियो । बर्सेनि खडेरीले यहाँको जनजीवन प्रभावित हुँदै गएपछी यो गाउँपालिकामा बसोबास गरिरहेका सयौ मानिसहरु बिस्तापित हुन बिबस छन्। धान खेती शुन्य भए पनि झापाबाट निर्यात हुने चामलले क्षेत्रका साझबिहानको छाकहरु जेन्तेन टरिरहेको थियो तर यस बर्ष भने मकै खेति समेत पनि उत्पादनमा शुन्य हात लागेपछि अब के गरेर बाच्ने भन्ने यहाँका जनजीवनको प्रश्नको जबाफ अनुत्तरित छ ।