पाँचथरमा मैदारोेको चर्चा

पाँचथर- पाँचथरको सदरमुकाम फिदिममा साहित्यकार भूपिनको उपन्यास मैदारो माथि विमर्श कार्यक्रम भएको छ ।

कवि निबन्धकारको रुपमा आफुलाई चिनाई सकेका भूपिनको यो पहिलो उपन्यास कृति हो । समाजमा अमानविय विभेदको रुपमा रहेको दलित जातिहरुसंगको छुवाछुत दलहनको पिडा अभिव्यक्त भएको यो कृति माथि साहित्यकारहरु प्रकाश थाम्सुहाङ,धर्मेन्द्र नेम्वाङ र प्रेम ओझाले परिचर्चा गरेका थिए ।

सोमवार नौलो साहित्य विहान प्रतिष्ठान र पाँचथर गजल मञ्चले संयोजन गरेको विमर्श कार्यक्रममा नौसाविका अध्यक्ष राम उपाध्यायले स्वागत गरेका थिए ।

विमर्श कार्यक्रमका वक्ताहरुले उपन्यासको भाषिक क्षमताको चर्चा गरेका थिए । अनेकन बिम्ब र प्रतिकको प्रयोगले उपन्यास शक्तिशालि भएको कार्यक्रममा चर्चा गरीएको थियो । वक्ताहरुले उपन्यासकारको रुपमा भूपिन सफल रहेको बताएको थियो । आञ्चलिक लोककथा र मिथकको प्रयोगले उपन्यास अझ सुनौलो भएको चर्चा गरीएको थियो ।

कार्यक्रममा वोल्दै उपन्यासकार भूपिनले आञ्चलिकताका प्रयोग गरी आफूले उपन्यास मार्फत सामाजिक यथार्थवाद र स्थानीय विषयलाई स्थापित गर्न खोजेको बताए ।

उपन्यासले नेपाल र भारतमा सदियौ देखि जरा गाडेर बसेको जातिय छुवाछुत र विभेदसँग सम्बन्धित विषयवस्तुलाई अँधेरी गाउँको कथा मार्फत समट्ने प्रयास गरेको छ ।

समग्रमा कृति पठनीय सलल बगेको छ । जीवन, कला, प्रेम, समाज र आञ्चलिकताको कथा मैदारो भएको विमर्श कार्यक्रममा चर्चा गरीएको छ ।

कार्यक्रममा संविधान सभाका सदस्य तथा पूर्व मन्त्री श्रीप्रसाद जवेगु सहित जिल्लाका साहित्यकारहरुको सहभागीता रहेको थियो ।