प्रचण्डले पहिलोपल्ट बोलाएको सचिवालय बैठकको के हो एजेन्डा?

काठमाडौं-  सत्तारुढ नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले पहिलोपटक पार्टी सचिवालय कमिटीको बैठक बोलाएका छन् ।

पार्टीको संगठनात्मक एकताका बाँकी काम नै बैठकको मुख्य एजेन्डा भएको बताइएको छ ।

प्रधानमन्त्री तथा पार्टी अध्यक्ष केपी शर्मा ओलीले आफ्नो अनुपस्थितिमा पनि बैठक बोलाउने र पार्टी निर्णय गराउने अधिकार दिएपछि दाहालले पहिलो पटक सोमबारका लागि बैठक बोलाएका हुन् ।

बैठक पार्टी कार्यालय धुम्बाराहीमा दिउँसो १ बजे बस्दैछ। 

ओलीले गत भदौ ५ गतेको सचिवालय बैठकमा अध्यक्ष दाहाललाई उक्त अधिकार दिएका थिए।

पार्टी एकताको १५ महिनासम्म पनि अध्यक्ष दाहालले पार्टीका बैठकको अध्यक्षता गर्न पाएका थिएनन्।