करिब ८० वरिष्ठ सहसचिवको सरुवा, पत्र दिन बाँकी

काठमाडौं- सरकारले एकैपटक करिब ८० जना वरिष्ठ सहसचिवको सरुवा गरेको छ। उनीहरूलाई प्रदेशका कार्यालयमा सरुवा गरिएको हो।

चालु आर्थिक वर्षभित्रमा सचिवमा बढुवा हुने वा उमेर हदका कारण अनिवार्य अवकाश पाउनेबाहेक प्रशासन र प्राविधिक दुवै समूहका सहसचिवलाई प्रदेशमा सरुवा गरिएको प्रधानमन्त्री तथा मन्त्रिपरिषद्को कार्यालयले जानकारी दिएको छ।

सहसचिव सरुवाको प्रस्ताव मन्त्रिपरिषद्‌बाट स्वीकृत भइसकेको छ। तर उनीहरूलाई पत्र भने दिइएको छैन।

सरुवा भई जाने स्थान पनि तय भइसकेको र  पत्र दिन मात्रै बाँकी रहेको संघीय मामिला तथा सामान्य प्रशासन मन्त्रालय स्रोतले जानकारी दिएको छ।

प्रशासन तर्फका मात्रै  ५० जनाभन्दा बढी सहसचिव सरुवामा परेका छन् भने बाँकी प्राविधिक सेवातर्फका छन्। 

प्रधानमन्त्री केपी शर्मा ओली उपचारका लागि सिंगापुर प्रस्थान गर्नुअघि नै वरिष्ठ सहसचिवहरूको सरुवा गरिएको हो। 

बिहीबार प्रधानमन्त्री ओली सिंगापुर प्रस्थान गरेका थिए।