नेकपा सचिवालय बैठक आइतबारलाई सारियाे

काठमाडाै-एकताका बाँकी काम पूरा गर्नका लागि सत्तारुढ दल नेपाल कम्युनिष्ट पार्टी (नेकपा)को सचिवालय बैठक भोलि (आइतबार)का बस्ने भएको छ।

शनिबार बस्ने भनिएको बैठक तयारी नपुगेका कारण आइतबारलाई सरिएको नेकपाले जनाएको छ।

महासचिव विष्णु पौडेल थप छलफल गर्नुपर्ने भएका कारण बैठक सारिएको बताए। ‘एकताका बाँकी कार्य पूरा गर्नका लागि थप छलफल आवश्यक रहेकाले बैठक सारिएको हो’, उनले भने।

उनले आइतबार दिउँसो ४ बजे प्रधानमन्त्री निवास बालुवाटारमा सचिवालयको बैठक बस्ने जानकारी दिए।

शुक्रबार बसेको सचिवालय बैठकले विभागको जिम्मेवारी बाँडफाँट टुंग्याएको छ। स्कुल विभागमा विवाद भएपछि लामो समयदेखि रोकिँदै आएको नेकपाको बैठक हिजो शुक्रबार बसेको थियो। स्एकुल विभागमा ईश्वर पोखरेलका नाममा सहमति भएसँगै विभागको जिम्मेवारी बाँडफाँट सकिएकाे हो।

 आइतबार बस्ने बैठकले नेकपाको केन्द्रीय सदस्यको कार्यविभाजन, पोलिटब्युरो गठन, जनवर्गीय सङ्गठनका इञ्चार्ज र सहइञ्चार्ज निर्धारण गर्ने बताइएको छ।

एकता हुन बाँकी रहेका सम्पर्क समन्वय कमिटी, विशेष प्रदेश कमिटी, प्रवास सङ्गठन, ज्येष्ठ कम्युनिष्ट मञ्च, अनुुशासन आयोग, लेखा आयोग, राष्ट्रिय परिषद् सदस्य गठनलगायतका छन् ।

अहिलेसम्म सचिवालय, स्थायी कमिटी, प्रदेश कमिटी, प्रदेश इञ्चार्ज, जिल्ला इञ्चार्ज र सहइञ्चार्ज, जनसङ्गठनका संयोजक र सहसंयोजक तथा जिल्ला र स्थानीय तह कमिटीका अध्यक्ष र सचिवको जिम्मेवारीको टुङ्गो लागेको छ। अधिकांश जिल्ला र स्थानीय तहका कमिटीले पूर्णता पाइसकेका छन्।

तत्कालीन नेकपा (एमाले) र नेकपा (माओवादी केन्द्र) बीच २०७५ जेठ ३ मा एकता भए पनि सबै कमिटीको एकता अझै सकिएको छैन।