मुख्यमन्त्री शाही लक्षित दोस्रो बम विस्फोट

सुर्खेत – कर्णाली प्रदेशका मुख्यमन्त्री महेन्द्रबहादुर शाहीलाई लक्षित गरि कालिकोटमा नेत्रविक्रम चन्द विप्लव समूहका कार्यकर्ताले बम विस्फोट गराएको छ। गृह जिल्लाको भ्रमण र योजनाहरुको अनुगमनमाका लागि कालिकोट पुगेका मुख्यमन्त्री शाहीलाई लक्षित गरी बिहीबार पुन: बम विस्फोट गराइएको हो।

यसअघि बुधबार पनि सोही समूहले मुख्यमन्त्रीलाई लक्षित गरी बम बिस्फोट गराएको थियो। 

बिहीबारको बम विस्फोटबाट मानवीय क्षति भने भएको छैन।

कोटिलागाउँबाट रास्कोटको कार्यक्रम स्थलतर्फ जाँदै गर्दा बिहान करिब दश बजेतिर रास्कोटमा दुई वटा बम विस्फोट गराइएको प्रहरीले जनाएको छ।

जिल्ला प्रहरी कार्यालय कालिकोटका प्रमुख विनोद शर्माका अनुसार रास्कोटको कृषि जेटिए कलेज नजिकै बम विस्फोट गराइएको हो। ‘बम पड्किएको सुनियो, म पनि मुख्यमन्त्रीसँगै छु।’, डिएसपी शर्माले भने, ‘आक्रमण भन्दा पनि टाढैबाट तर्साउन खोजेका होलान।’

उनका अनुसार विप्लव समूहले मुख्यमन्त्री शाही र प्रदेशसभा सदस्य कुर्मराज शाहीलाई लक्षित गरी बम विस्फोट गराएको हो।

यस्तै कालिकोटमा हिजो (बुधबार) पनि विप्लव समूहले मुख्यमन्त्री शाहीलाई नै लक्षित गरी बम विस्फोट गराएको थियो। घटनाबारे थप अनुसन्धान भैरहेको प्रहरीको भनाइ छ। कालिकोट विप्लव प्रभावित क्षेत्र मानिन्छ।