ओलीले अहम् देखाएकै कारण नेकपा फुटेको हो : माधव नेपाल

काठमाडौँ- तत्कालीन नेपाल कम्युनिष्ट पार्टी (नेकपा) फुटाउने नेकपा एमालेका अध्यक्ष केपी शर्मा ओली नै भएको दाबी नेकपा (एकीकृत समाजवादी) का अध्यक्ष माधवकुमार नेपालले गरेका छन् । पार्टीको स्कुल विभागले आयोजना गरेकाे स्थानीय तहका जनप्रतिनिधि अभिमुखीकरणलाई सम्बोधन गर्दै नेपालले सो कुरा बताएका हुन् ।

नेपालले केपी शर्मा ओलीलाई नेकपा फुटाएपछिका दिनमा पनि पार्टीलाई एकताबद्ध गर्न नसकेको आरोप समेत लगाएका छन् ।

एमालेमा राजा, महाराजाको गन्ध आएपछि आफूले नयाँ पार्टी गठन गरेको पनि नेपालले बताएका छन् । ओलीले अहम् देखाएकै कारण अहिलेको अवस्था सिर्जना भइरहेको उनले बताए ।

उनले भने, “सर्वोच्चले पहिलाकै अवस्थामा जानु भनेर आदेश आइसकेपछि पार्टी निर्माण गर्न बाध्य भयौँ । ०७५ जेठ ३ गते नेपाल कम्युनिष्ट पार्टी (नेकपा) बनेको थियो । फेरि २०७५ फागुन २३ गतेको फैसलाले नेकपा एमाले र नेकपा माओवादी केन्द्र छुट्टिए । यो फुटाउने काममा केपी ओलीजीले भूमिका खेल्नुभयो। त्यसको रहस्य एमालेलाई एकताबद्ध गराउने होला भन्ने आशा गरेका थियौँ । तर फागुन २८ गते एकलौटी बैठक बसेर केपी ओली पक्षका मान्छेको मात्रै उपस्थिति गराएर एकलौटी पार्टीको विधान संशोधन भयो । हामीले नेकपा एमाले कम्युनिष्ट पार्टी नरहेको थाहा पाएपछि हामी बाहिरियौँ । त्यसमा राजा‚ महाराजाका गन्ध आए। त्यसपछि सबै साथीले नयाँ ढंगबाट जानुपर्ने कुरा राखेपछि नै हामी नयाँ पार्टी निर्माण गरेर आएका हौँ ।”