“सोनाम ल्होछार २८५३ औं ज्या ल्हो” को सम्पुर्ण तयारी पूरा

सोल – नेपाल तामाङ संघ दक्षिण कोरियाले आउदै गरेको राष्ट्रिय पर्व तथा तामाङ समुदायको महान चाड ” सोनाम ल्होछार २८५३” औं ज्या ल्हो (चरा वर्ष ) को सम्पुर्ण तयारी पूरा गरेको छ ।सोनाम ल्होछार कोरियन नयाँ वर्ष सलनालको पहिलो दिन जनवरी २७ मा मनाउने तय भैसकेको छ।

 
“तामाङ कला संस्कृतिको संरक्षणमा हाम्रो एकता  संघीय राज्य र आर्थिक संवृद्वी आजको आवश्यकता” भन्ने मुल नाराका साथ यो वर्ष टे ल्हो ( बाँदर वर्ग) को बिदाई र ज्या ल्हो (चरा वर्ष) को भव्य रुपमा स्वागत गरि मौलिक चाड सोनाम ल्होछार मनाउन लागेको हो । सदाका वर्ष झैं यो वर्ष पनि संघले लामा गुरुहरुबाट विशेष पुजापाठ गरि सोनाम ल्होछारको सुरुवात हुने जनाएको छ ।

सोनाम ल्होछार सांस्कृतिक कार्यक्रम हरेक वर्ष कोरियन सलनालमा मनाउने भएकोले ल्होछार बिशेष परिकारहरु र तामाङ जातीको मौलिक भेषभुषाको प्रदर्शन साथमा बिभिन्न तामाङ सेलो, मेहेन्दोमायाँ नृत्य , गीत र स्थानीय तथा राष्ट्रिय तामाङ कलाकारहरुको बेजोड सांगीतिक प्रस्तुति कार्यक्रमको मुख्य आकर्षण रहने कुरा आयोजकले जनाएको छ।

 
ल्होछार कार्यक्रमलाई भव्य रूपमा सफल बनाईदिनका लागि कोरियामा रहेका विभिन्न क्षेत्रीय र जातीय संघ संस्थाहरु ,राजनीतिक भातृ संगठनहरु, सामाजिक अभियान्ताहरु , व्यापारी , बुद्धिजीवी , विद्यार्थी , पत्रकार ,खेलाडी , कोरियावासी नेपाली समुदायमा संघले अनुरोध गरेको छ ।

साथै सो दिन बिशेष सोनाम ल्होछार कार्यक्रम भएको हुनाले कोरियावासी तामाङ दाजुभाइ तथा दिदिबहिनीहरुलाई जातीय पोशाकमा उपस्थित भै कार्यक्रमलाई भव्य रुपमा सफल बनाईदिनुहुन तामाङ संघका अध्यक्ष उईनासिङ वाईवा तामाङले अनुरोध गरेका छन्।