अमेरिकी भिसा र ग्रिनकार्डमा कडाइ

एजेन्सी- अमेरिकाले गरिब आप्रवासीहरूका लागि भिसा अवधि लम्ब्याउन तथा स्थायी बासिन्दाको हैसियत वा ग्रीन कार्ड प्रदान गर्न थप कठिन हुने नीति ल्याउने तयारी गरेको छ ।

ट्रम्प प्रशासनको सो नीतिले एक वर्षभन्दा बढी समय खानेकुरामा सहुलियत वा सार्वजनिक आवास सुविधा जस्ता सरकारी सहुलियत लिएका आप्रवासीलाई लक्षित गरेको छ।

त्यस्ता आप्रवासी भविष्यमा पनि त्यस्तै सार्वजनिक सुविधामा निर्भर हुन सक्ने सम्भावना देखेमा सरकारले उनीहरुको निवेदन अस्वीकार गर्न सक्नेछ। अधिकारीहरूले यो नियमले आफैं निर्भर हुन प्रोत्साहन गर्ने दाबी गरेका छन् ।

‘पब्लिक चार्ज रुल’ नामक नियम सोमवार संघीय रजिस्टारमा प्रकाशित भएको थियो । यो नयाँ नियम अक्टोबर १५ देखि लागु हुनेछ। अमेरिकामा स्थायी बासिन्दाको हैसियत पाइसकेका आप्रवासीहरूलाई यो परिवर्तनले खासै असर गर्नेछैन।

शरणार्थी वा शरणका लागि निवेदन दिएकाहरूको निम्ति पनि यो लागु हुनेछैन। तर भिसा अवधि लम्ब्याउन, ग्रीन कार्ड तथा अमेरिकी नागरिकताका लागि निवेदन दिएकाहरूलाई यसले असर पार्नेछ।

आम्दानीको स्तर भेट्टाउन नसक्ने वा सरकारी सुविधामा निर्भर हुनसक्ने लागेमा तिनलाई भविष्यमा अमेरिका भित्रन रोक्न सक्नेछ। अमेरिकामा करिब २ करोड २० लाख मानिस कानुनी रुपमा अमेरिकामा बसेपनि उनीहरुको नागरिकता छैन ।