नेकपामा एक पक्षले अर्काेलाइ खुल्याइने रणनीति, थापा र दीपशीखा उत्रे आराेप-प्रत्याराेपमा

काठमाडौं । सत्तारूढ नेपाल कम्युनिस्ट पार्टी (नेकपा)को एकताले पूर्णता पाएको छैन । साउन मसान्तभित्र एकता टुंग्याउने भनेर मिति तय गरिए पनि एकता निष्कर्षमा पुग्नेमा संशय छ । कारण– पार्टी अध्यक्ष केपी शर्मा ओली उपचारको सिलसिलामा विदेश छन् । सोमबार फर्किने मिति तय भए पनि बाँकी दिनमा एकता टुंगिन सम्भावना न्यूनप्रायः छ ।

एकताको अध्याय पूरा नहुँदै नेकपाका दुई नेताको फेसबुकमा जुहारी नै चलेको छ । गत शुक्रबार पार्टीका नेता दीनानाथ शर्माको पुस्तक वितरण समारोहमा अध्यक्ष पुष्पकमल दाहालले दशक लामो हिंसात्मक संघर्षको क्रममा आफूले एकजनाको पनि हत्या नगरेको भन्दै सफाइ दिए । त्यसैलाई लिएर नेकपाका केन्द्रीय सदस्यद्वय सूर्य थापा र रामप्रसाद सापकोटा ‘दीपशीखा’बीच दन्तबजान चलिरहेको छ ।

उनले अगाडि लेखे, “हिजोको महान र हाल परित्याग गरिसकेको जनयुद्धमा मार्ने र मर्ने महान कार्यको दोषको भारी एक जना मनैदेखिको शान्तिकामीका हैसियतमा सुप्रिम कमाण्डरले मात्र बोक्न कसरी सम्भव हुन्छ ? विगतसँग क्रमभङ्गग गर्दै हामीहरू यहाँसम्म आइपुगेको त बिर्सन मिल्दैन नि ! आजको क्रान्तिकारी तरंग र मनोदशा !”

थापाको भनाइ कोट गर्दै युवा संघका नवनियुक्त अध्यक्षसमेत रहेका दीपशिखाले सामाजिक सञ्जालमै जवाफ फर्काए– “ सूर्यजी ! पार्टी केन्द्रीय सदस्य जस्तो जिम्मेवार व्यक्तिले आफ्नो अध्यक्षप्रति बारम्बार गर्ने यस्तो आक्रमण अब सह्य हुँदैन । पार्टी अनुशासन, आत्मानुशासन नमान्ने र काम नै पार्टी नेतृत्वको विरोध गर्ने बनाउने भए आफूले लिएको जिम्मेवारी त्याग गर्दा राम्रो हुन्छ । हामी तपाईंले जस्तै विषयलाई बङ्ग्याउन र हिजोको विगत भन्न नजानेर नबोलेको होइन, पार्टी अनुशासन मानेर नबोलेको हो । सुझाव– यस्ता गाली आजकल फस्टाउँछ भन्ने लागेको भए यसलाई पेसा बनाए हुन्छ !”

गालीलाई पेसा बनाएर राजनीति छाड्न सुझाव दिएलगत्तै थापाले पुनः आक्रोश व्यक्त गरे, “दीपशिखाले अनुशासन र मर्यादा सिकाउने ? कति हाँस्नु ! यस्तो दादागिरी स्वीकार्य हुन्छ भन्ठानेको ? विचरा !”

केही घण्टा अघिसम्म त बहसको केन्द्रमा थापा र दीपशिखा थिए । अहिले आगो सल्किएर साविक एमाले र माओवादी केन्द्रका नेताहरूको टाइमलाइनमा पुगिसकेको छ ।
यसले पार्टी मिले पनि साविकका पार्टीका नेताहरूको मन मिल्न बाँकी रहेको तथ्य उजागर गर्दछ ।

प्रचण्डविरुद्ध किन खनिन्छन् सूर्य थापा ?

सूर्य थापा शुरूदेखि नै माओवादी नेतृत्वको जनयुद्धको आलोचकका रूपमा चिनिन्छन् । पार्टी एकतापछि पनि उनको यो विचारमा फेरबदल आएको छैन ।

पार्टी एकताअगावैदेखि ईश्वर पोखरेल नजिक रहेका थापा प्रचण्डको पनि आलोचकका रूपमा चिनिन्छन् ।

पछिल्लोपटक वैचारिक कार्यदिशाका सन्दर्भमा पार्टी अध्यक्ष प्रचण्ड र पोखरेल आमुन्नेसामुन्ने भएपछि सामाजिक सञ्जालमा उनले जबजको पक्षमा विचार अभिव्यक्त गर्दै आएका छन् ।
यसैको पछिल्लो कडी भएको कतिपयको बुझाइ छ ।

त्यसो त दुई कार्यकाल महासचिव चलाइसकेका पोखरेललाई स्कुल विभाग समेत नदिइने गरी लबिइङ बढ्न थालेपछि र विवादित बनाइएपछि उनी प्रचण्डप्रति बढी नै क्षुब्ध देखिन्छन् ।
त्यसको प्रतिवाद उनले यसरी गरेका थिए, “नेकपामा पूर्वएमाले कसैको जिम्मेवारी खुमलटारको दया, कृपा र सहमतिमा तोकिने होइन । त्यहाँको दुःख सीमा थाहा नपाउने शायदै कोही होला ?”

तर, थापा ‘अध्यक्ष प्रचण्डले जथाभावी विचार राख्दै हिँडेकाले आफूले तर्क गर्नुपरेको’ बताउँछन् । “शासकले नागरिकलाई धम्की दिएको शोभनीय होइन । योग्यतापूर्वक काम गरे कसैको केही लाग्दैन । मनको बाघसँग डराउनु त कायरता पो मानिन्छ त !” थापाले केही समयअघि प्रचण्डले ज्ञानेन्द्र शाहलाई नागार्जुनबाट निकाल्ने अभिव्यक्तिको समेत कटाक्ष गरेका थिए । थापाले पार्टी अध्यक्ष प्रचण्डले मन्त्री हेरफेरको हल्ला चलाएको बताउँदै त्यतिबेला पनि काउन्टर दिएका थिए, “धेरै मन्त्री हेरफेरको हल्ला अस्थिरता बढाउने उत्ताउलो हुइयाँ थियो ! रिक्त स्थानमा मात्र मन्त्रीको नियुक्ति एक विवेकपूर्ण कदम हो ।”