गौतम बुद्ध अन्तराष्ट्रिय क्रिकेट रंगशालालाई माडीको १ लाख ११ हजार १ सय ११ रुपैंया सहयोग

चितवन – गौतम बुद्ध अन्तराष्ट्रिय क्रिकेट रंगशाला निर्माण सहयोगार्थ उद्योग बाणिज्य संघ, माडीले १ लाख ११ हजार १ सय ११ रुपैंया सहयोग गर्नेभएको छ । रंगशाला निर्माण सहयोगका लागि माडीको बसन्तपुरमा सञ्चालित एक कार्यक्रमलाई सम्बोधन गर्दै उद्योग बाणिज्य संघ, माडीका अध्यक्ष रेशमलाल आचार्य (तुलसी)ले सो घोषणा गर्नुभएको हो ।

माडी नगरपालिकाद्वारा माडीको बसन्तपुरमा आयोजित रंगशाला निर्माण सहयोग सम्बन्धी अन्तरक्रियात्मक कार्यक्रममा धुर्मुस सुन्तली फाउण्डेशनका अध्यक्ष सिताराम कट्टेल धुर्मुसको विशेष उपस्थिति रहेको थियो । कार्यक्रममा माडीका नगरप्रमुख ठाकुर प्रसाद ढकाल, उपप्रमुख ताराकुमारी काजी महतोसंगै जिल्ला समन्वय समिति चितवन, उद्योग बाणिज्य संघ माडी र माडीका विभिन्न निकाय एवं संघसंस्थाहरुका पदाधिकारी एवं प्रतिनिधीहरुको सहभागिता रहेको थियो ।

यसैबिच, आजको कार्यक्रममा क्रिकेट रंगशाला निर्माण सहयोगार्थ माडी नगरस्तरीय सहयोग समिति समेत गठन गरिएको छ । माडी नगरपालिकाका नगरप्रमुख ठाकुरप्रसाद ढकालको संयोजकत्वमा हाल ७६ सदस्यीय सहयोग समिति गठन गरिएको छ भने उक्त समित पुनः संख्या बढ्नसक्ने बताइएको छ । त्यस्तै सह–संयोजकमा नगर उपप्रमुख ताराकुमारी काजी महतो रहनुभएको छ भने सदस्य सचिवमा उद्योग वाणिज्य संघ माडीका अध्यक्ष रेशमलाल आचार्य लगायतका प्रतिनिधिहरु रहनुभएको छ ।