चाेरीका घटना बढे, धेरै घटना उपत्यकामा  

काठमाडौ‌ं: देशभर चोरीका घटना लगभग शतप्रतिशतले बढेको छ। आर्थिक वर्ष ०७५/७६ मा देशभर चोरीका घटना २ हजार ८ सय ७३ रहेको प्रहरी प्रधान कार्यालयले जनाएको छ। हरेक वर्ष चोरीका घटना देशभर बढ्दो छ।

प्रहरी तथ्यांकअनुसार आर्थिक वर्ष ०७४/७५ मा देशभर चोरीका घटना एक हजार ६ सय २८ रहेको थियो। साधारण चोरी शीर्षकअन्तर्गतका घटना ह्वात्तै बढेका हुन्।

गत आर्थिक वर्ष साधारण चोरीका घटना २ हजार तीन सय २४ रहेको थियो। आर्थिक वर्ष ०७४/७५ मा यो शीर्षकअन्तर्गत एक हजार ३ सय २० वटा मुद्धा दर्ता भएको प्रहरी प्रधान कार्यालयले जनाएको छ। गत आर्थिक वर्षमा  देशभर डाका चोरीका घटना २ सय १८ र सवारी चोरीका घटना एक सय ३२ वटा भएको प्रहरी तथ्यांक छ।

कडा सुरक्षा व्यवस्था र प्रहरीको बाक्लो उपस्थिति रहेको काठमाडौं उपत्यकामा चोरीका घटना हरेक वर्ष बढ्दो छ। देशभरको तुलनामा एक चौथाई चोरीका घटना काठमाडौं उपत्यकामा मात्र हुन्छन्।

महानगरीय प्रहरी कार्यालय रानी पोखरीका अनुसार गत आर्थिक वर्षमा उपत्यकाभित्र ६ सय ७९ वटा साधारण चोरीका घटना भएका भएका थिए। आर्थिक वर्ष ०७४/७५ मा उपत्यकाभित्र यो शीर्षकका चोरीका घटना तीन सय ६४ रहेको थियो।

यस क्षेत्रमा गत आर्थिक वर्षमा ९३ वटा डाँका चोरीका घटना भएको थियो। महानगरीय प्रहरी कार्यालयका अनुसार उपत्यकाभित्र डाका तथा डाका चोरीका घटना पनि ठुलो मात्राले बढेको हो। यसैगरी गत आर्थिक वर्षमा सवारी साधन चोरीका घटना ५१ वटा भएको महानगरीय प्रहरी कार्यालयले जनाएको छ।

गत भदौदेखि लागु भएको मुलुकी फौजदारी अपराध संहिताले चोरी कसुरमा पनि कडा सजायको व्यवस्था गरेको छ। चोरीलाई साधारण, नकबजनी र डाका चोरीका रुपमा वर्गिकरण गर्दै २ देखि १४ वर्षसम्मको कैद सजाय व्यवस्था गरेको छ। साधारण चोरीमा २ देखि ७ वर्ष, नकबजनी चोरीमा ३ देखि ५ वर्ष र डाँका चोरीमा ७ देखि १४ वर्षसम्म कैद सजायको प्रावधान राखिएको छ।

‘तर चोरीमा चोरी भएको सामान बरामद भएमात्र मुद्धा बलियो हुन्छ। नत्र यसैले चोरेको हो भनेर यकिन भएपनि आरोप स्थापित गर्न सजिलो हुन्न’, लामो समयदेखि चोरी अपराधमा अनुसन्धान गरिरहेका एक प्रहरी अधिकारी भन्छन्।