आजको मौसम : प्रदेश १ र बागमतीमा भारी वर्षाको सम्भावना

काठमाडौँ- जल तथा मौसम विज्ञान विभागका अनुसार मनसुनी वायुको प्रभाव रहेकाले देशका अधिकांश स्थानमा वर्षाको सम्भावना रहेको छ ।

हाल देशका अधिकांश भूभागमा सामान्यदेखि पूर्ण बदली रहेको छ। प्रदेश–१ प्रदेश–२, बागमती र गण्डकी प्रदेशका केही स्थानहरूमा सामान्य वर्षा भइरहेको मौसम पूर्वानुमान महाशाखाले जनाएको छ ।

दिउँसो देशभर सामान्यदेखि पूर्ण बदली रही केही स्थानहरूमा वर्षाको सम्भावना रहेको महाशाखाको भनाइ छ । प्रदेश–१, बागमती र लुम्बिनी प्रदेशका केही स्थानमा भारी वर्षाको सम्भावना रहेको महाशाखाले बताएको छ ।

महाशाखाका अनुसार राति पनि देशभर सामान्यदेखि पूर्ण बदली रही केही स्थानहरूमा हल्कादेखि मध्यम वर्षाको सम्भावना रहेको छ ।

प्रदेश–१ र बागमती प्रदेशका केही स्थानमा भारी वर्षा हुने र नदीमा उच्च बहावको सम्भावना रहेकाले तटीय क्षेत्रमा आवश्यक सतर्कता अपनाउनसमेत महाशाखाले अनुरोध गरेको छ ।