आजको मौसम : यी प्रदेशमा भारी वर्षाको सम्भावना

काठमाडौँ- जल तथा मौसम विज्ञान विभागका अनुसार मनसुनी न्यून चापीय रेखा नेपालको पश्चिमी तराई नजिक रहेकाले देशका अधिकांश स्थानमा बदली रहेको छ
।

विभागले हाल देशभर सामान्यदेखि पूर्ण बदली अधिकांश स्थानमा सामान्य वर्षा भइरहेको बताएको छ । आज दिउँसो देशभर सामान्यदेखि पूर्ण बदली रही धेरै स्थानहरूमा हल्कादेखि मध्यम वर्षाको सम्भावना रहेको विभागको भनाइ छ ।

विभागका अनुसार गण्डकी, लुम्बिनी र सुदूरपश्चिम प्रदेशका केही स्थानहरूमा मेघ गर्जनसहित भारी वर्षाको सम्भावना रहेको छ । त्यस्तै राति देशभर सामान्यदेखि पूर्ण बदली रही धेरै स्थानहरूमा हल्कादेखि मध्यम वर्षाको सम्भावना रहेको छ । प्रदेश–१, बागमती प्रदेश र गण्डकी प्रदेशका केही स्थानमा भारी वर्षाको सम्भावना रहेको छ ।

भारी वर्षासँगै पहाडी भागमा पहिरो तथा नदीहरुमा बाढीको सम्भावना रहेकाले तटीय क्षेत्रमा आवश्यक सतर्कता अपनाउन विभागले आग्रह गरेको छ ।