आजको मौसम : केही स्थानमा भारी वर्षाको सम्भावना

काठमाडौँ- आज पनि मनसुन सक्रिय भएसँगै देशभर वर्षा भइरहेको छ । हाल देशभर सामान्यदेखि पूर्ण बदली रही प्रदेश १ र गण्डकी प्रदेशका थोरै स्थानहरुमा वर्षा भइरहेको छ ।

जल तथा मौसम पूर्वानुमान महाशाखाका अनुसार मनसुनी वायुकै प्रभावले आज दिउँसो प्रदेश–१ र गण्डकी प्रदेशमा ‘भारी’ वर्षाको सम्भावना रहेको छ । महाशाखाले मंगलबार र बुधबार पनि विभिन्न स्थानमा भारी वर्षाको सम्भावना रहेकाले आवश्यक सतर्कता अपनाउन आह्वान गरेको छ ।

मौसमविद् मीनकुमार अर्यालका अनुसार देशभर नै मनसुनी वायुको प्रभाव रहेको र त्यसैको प्रभावले मौसम बद्ली हुने छ । अर्यालले काठमाडौं उपत्यकामा पनि मौसम बद्ली भएर सामान्य पानी पर्ने सम्भावना रहेको छ ।

महाशाखाले जारी गरेको सूचनामा लेखिएको छ “प्रदेश १ र गण्डकी प्रदेशका एक वा दुई स्थानमा मेघगर्जन/चट्टयाङसहित भारी वर्षाको सम्भावना रहेको र उक्त प्रदेशहरुको पहाडी भू(भागमा पहिरो तथा गेग्रान बहावको जोखिम रहेको, नदीनाला तथा खहरे खोलाहरुमा पानीको सतह बढ्न सक्ने तथा यातायात क्षेत्र प्रभावित हुन सक्ने भएकोले आवश्यक सतर्कता अपनाउनु हुन सबैमा अनुरोध ।”